ក្រៅពីរបរស្រែចំការនិងលក់ដូរនៅពេលថ្ងៃ អ្នកឃុំបារាយណ៍មួយចំនួនបានឆ្លៀតធ្វើការងារផ្សេងដើម្បីរកកម្រៃចិញ្ចឹមជីវិត ដែល ជាមុខរបរបន្ទាប់បន្សំមួយអាចរកប្រាក់ចំណូលបន្ថែមជួយជីវភាពគ្រួសារ។

មុខរបរលក់បុកល្ហុង គឺជាមុខរបរមួយដែលអាចជួយសម្រួលជីវភាព និង សេដ្ឋកិច្ចគ្រួសារសម្រាប់អ្នកភូមិបារាយណ៍តូច ខេត្តកំពង់ធំ។

ក្រៅពីស្រ្តីមេផ្ទះហើយ អ្នកស្រី ម៉ុត មារ៉ាឌី ជាអាជីវករលក់បុកល្ហុងដែលរស់នៅក្នុងភូមិ បារាយណ៍តូច ឃុំ បារាយណ៍ ស្រុក បារាយណ៍ ខេត្តកំពង់ធំ បានចាប់មុខរបរបន្ទាប់បន្សំក្នុងការធ្វើសៃយ៉លក់បន្តនៅលើទីផ្សា។

អ្នកស្រីបានឲ្យដឹងទៀតថា ក្នុងមួយថ្ងៃ អ្នកស្រីអាចលក់បានចាប់ពី ២០ ម៉ឺនរៀល រហូតដល់ទៅ ៦០ ម៉ឹនរៀល​ អាស្រ័យតាមតម្រូវការរបស់អតិថិជន។ អ្នកស្រីថាមុខរបរនេះ បានជួយឲ្យជីវភាពគ្រួសាររបស់អ្នកស្រីមានភាពធូរធារច្រើន ព្រមទាំងអាចផ្គត់ផ្គង់ តម្រូវការផ្សេងៗ នៅក្នុងគ្រួសាររបស់អ្នកស្រីផងដែរ។

អ្នកស្រីបានអំពាវនាវឲ្យជួយគាំទ្រអាជីវកម្មខ្នាតតូចក្នុងស្រុក ព្រោះវាអាចជាកត្តាមួយជួយកាត់បន្ថយការធ្វើចំណាកស្រុកទៅធ្វើការនៅក្រៅប្រទេស។

សូមបញ្ជាក់ថា បុកល្ហុងគឺជាគឺជាអាហារម្យ៉ាងដែលខ្មែរយើងតែងតែញ៉ាំលេង (មិនមានបាយ) ដោយមានរស់ជាតិហិល ធ្វើឡើងដោយល្ហុង និង បង្គារស្រស់ៗ៕

អត្ថបទខ្លីសរសេរដោយ សេង សុភក្រិ្ត យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។

The post អ្នកភូមិបារាយណ៍តូច៖ មុខរបរលក់បុកល្ហុងជួយកាត់បន្ថយការធ្វើចំណាកស្រុក និង ភាពក្រីក្រ appeared first on WMC.

កំពង់ស្ពឺ៖ ធ្វើដំណើរពីរាជធានីភ្នំពេញតាមផ្លូវជាតិលេខបី មកដល់ផ្សារដើមរកា បត់ស្តាំតាមក្លោងទ្វាវត្តហូជ្រៃព្នៅ យើងនឹងទៅដល់ភ្នំមួយមានឈ្មោះថា ភ្នំហូព្នៅ។ ពេលធ្វើដំណើរមកដល់ជើងភ្នំនេះ យើងត្រូវធ្វើដំណើរបន្តតាមផ្លូវបេតុងវែងមួយ ដែលមានព្រៃព្រឹក្សាដុះអមសងខាងយ៉ាងខៀវស្រងាត់ ជាមួយផ្ទាំងថ្មធំៗដុះជាប់ជញ្ជាំងជើងភ្នំលាយឡំនឹងសំឡេងចាបយំយ៉ាងពិរោះផ្តល់ភាពស្រស់ថ្លាក្នុងអារម្មណ៍។

ធ្វើដំណើរបន្តផុតភាពអណ្តែតអណ្តូងនឹងដងព្រឹក្សព្រៃសំឡេងបក្សីយំ យើងនឹងឡើងដល់កំពូលភ្នំហូព្នៅ។ ពេលឡើងមកដល់កំពូលភ្នំនេះ យើងនឹងមើលឃើញកុដព្រះចៅអធិការវត្ត និងដើមរាំងភ្នំមានក្លិនផ្កាក្រអូបសាយភាយទៀតផង។

បើក្រលេកមកស្តាំដៃវិញ យើងនឹងឃើញព្រះវិហារមួយនៅសល់ពីសម័យសង្រ្គាមលោក នោះគឺវត្ត ហូជ្រៃព្នៅ ដែលប្រជាពលមួយចំនួនតែងមកទីនេះ ដើម្បីបុណ្យស្រន់សុំសេចក្តីសុខ និងប្រកបការងារមានជោគមានជ័យក្នុងជីវិត។

វត្តហូជ្រៃព្នៅ នេះស្ថិតនៅក្នុងភូមិព្រៃខ្លុង ឃុំវាល ស្រុកគងពិសី ខេត្តកំពង់ស្ពឺ។ តាមប្រសាសន៍លោក ម៉ី សឿន ជាអតីតគ្រូបង្រៀននៅវិទ្យាល័យហូជ្រៃព្នៅបានឱ្យដឹងថា វត្តហូជ្រៃព្នៅ ​កសាងឡើងតាំងពីជំនាន់ព្រះចៅអធិការទី១ មកម្ល៉េះ ពោលគឺកសាងឡើងមុនសង្គ្រាមលោកលើកទី១(១៩១៤-១៩១៨) គិតមកដល់បច្ចុប្បន្នមានអាយុកាលជាង១០០ឆ្នាំហើយ។

ចំពោះសំណង់ព្រះវិហារវិញ គឺសសរធ្វើអំពីឥដ្ឋតាន់លាយបាយអ ចំណែកដំបូលប្រក់ក្បឿងស្រកាត្រីនិងដៃរណែងធ្វើអំពីឈើ។ ដោយសារវ័យចាស់ផង វត្តហូជ្រៃព្នៅនេះ មានសឹក រេចរិលដោយកន្លែង ចំណែកសសរខ្លះ និងបង្កាន់ដៃក៏មានស្នាមប្រេះផងដែរ។

បើតាមប្រសាសន៍ដូនជីរស់នៅលើកំពូលភ្នំនេះ បានប្រាប់ថា សព្វថ្ងៃមានព្រះសង្ឃគង់ នៅលើភ្នំនោះចំនួន ១៨ អង្គ និងយាយជី ៥ នាក់។ ពេលមានបុណ្យទានម្តងៗមានប្រជាជនទៅលេងនៅទីនោះច្រើនកុះករ។

ព្រះតេជគុណ ប៉ែន នី ព្រះចៅអធិការវត្ត ហូជ្រៃព្នៅ មានសង្ឃដីកាថា ភ្នំនេះមានកំពូលបី គឺខាងកើតឈ្មោះយាយពៅ កណ្តាលឈ្មោះយាយទេព និងខាងលិចឈ្មោះតាដំបងដែក។ មិនតែប៉ុណ្ណោះភ្នំហូព្នៅនេះ ខ្ទមអ្នកតា សរ នៅចង្កះភ្នំខាងជើង អ្នកតាក្រហមក និងប្រាសាទបុរាណជាដើម សុទ្ធជាកន្លែងដែលសក្ត័សិទ្ធិសម្រាប់ជាទីសក្ការបូជារបស់ប្រជាពលរដ្ឋ៕

ខាងក្រោមនេះជារូបភាពសំណង់វត្តដែលបាក់បែកដោយកន្លែង

អត្ថបទខ្លីសរសេរដោយ ថាន់ ស្រីណាង យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។

The post វត្តចំណាស់ជាង ១០០ ឆ្នាំសណ្តូកខ្លួនលើខ្នងភ្នំហូព្នៅទីកន្លែងសក្ការស្ងប់ស្ងាត់ខ្សត់អ្នកស្គាល់ appeared first on WMC.

ភ្នំពេញ៖ ថ្នាក់ដឹកនាំនៃអតីតបក្សប្រឆាំង អះអាងថានឹងចូលកម្ពុជាដើម្បីប្ដូរការដឹកនាំ ឯបក្សកាន់អំណាចវិញថា នឹងប្រឆាំងវត្តមានរបស់ក្រុមប្រឆាំង ដោយការចាប់ដាក់គុក ឬមានការបង្ក្រាបដោយកម្លាំង ។ ប្រសិនបើវត្តមានរបស់លោក សម រង្ស៊ី នៅកម្ពុជាតាមកាលកំណត់ មានផ្ទុះហឹង្សា ថាតើមានភាគីណាជាអ្នកអន្តរាគមន៍ ហើយបើគ្មានផ្ទុះហឹង្សាទេ តើនឹងមានលទ្ធផលបែបណា ?
សូមស្ដាប់លោក សោម លាភ ធ្វើសេចក្ដីអត្ថាធិប្បាយអំពីព័ត៌មាននេះ៖

លោក សម រង្ស៊ី ត្រៀមវិលចូលកម្ពុជាវិញ
ថេរវេលានៃការកំណត់ចូលស្រុកវិញ របស់លោក សម រង្ស៊ី និងក្រុមរបស់លោកមួយចំនួន រួមទាំងមានមន្ត្រីនៃប្រទេសដទៃអមដំណើរនោះ មានត្រឹមតែពីរខែទៀតតែប៉ុណ្ណោះ ពោលគឺមាតុភូមិនិវត្តនេះ ត្រូវបានកំណត់ថា នឹងកើតឡើងនៅថ្ងៃទី ៩ ខែវិច្ឆិកា ឆ្នាំ ២០១៩ ។
អ្វីដែលគួរឱ្យកត់សម្គាល់ជុំវិញព្រឹត្តិការណ៍នយោបាយនៅកម្ពុជាដែលបានវិវត្តន៍ថ្មីៗនេះ គឺថាទាំងមុនពេលដែលលោក សម រង្ស៊ី កំណត់ពេលវេលាជាក់លាក់ មន្ត្រីរាជរដ្ឋាភិបាលឯណេះវិញ បានប្ដេជ្ញាថា នឹងមានការបង្រ្កាប ដោយចាត់ទុកថាបង្ក្រាបអំពើបដិវត្តពណ៌ផ្ដួលរំលំរដ្ឋាភិបាល ។
ក្នុងនាមជានាយរដ្ឋមន្ត្រីកម្ពុជា កាន់អំណាចជិត ៤០ ឆ្នាំ ដែលប្រកាសថា នឹងមិនឆ្លើយតបឡើយ ជាមួយលោក សម រង្ស៊ី ដោយមន្ត្រីរាជរដ្ឋាភិបាលចាត់ទុកអ្នកនយោបាយនិរទេសខ្លួនក្រៅប្រទេស ថាជាទណ្ឌិតរត់ចោលស្រុក ។
មិនមែនមានតែមន្ត្រី ឬសមាជិករាជរដ្ឋាភិបាលតែប៉ុណ្ណោះនោះទេ ដែលតែងតែពិភាក្សាទៅលើប្រធានបទនៃការវិលចូលកម្ពុជាពីប្រធានស្ដីទីអតីតគណបក្សប្រឆាំង ក៏មានការលើកឡើងពីមជ្ឈដ្ឋានជាច្រើន ពាក់ព័ន្ធទៅនឹងថាតើ នឹងមានវិធានការបែបណាពីរាជរដ្ឋាភិបាល ហើយបើមានវិធានការ តើមានវត្តមានលោក សម រង្ស៊ី នោះទេ ។
គេដឹងជាទូទៅថា ការប្រកាសថានឹងវិលចូលកម្ពុជាវិញ របស់លោក សម រង្ស៊ីជាថ្មីម្ដងទៀតនេះ មិនមែនជាលើកទីមួយនោះទេ ។
យ៉ាងណា មានការលើកឡើងថា ការពន្យាពេលរបស់លោក សម រង្ស៊ី អាចជាការដើម្បីឱ្យរាជរដ្ឋាភិបាលកម្ពុជាបើកភ្លើងខៀវឱ្យ ពោលគឺកាលៈទេសៈមិនទាន់ដល់ ។
អ្នកវិភាគមួយចំនួនក៏ថាដែរថា ការប្រកាសកំណត់ថេរវេលារបស់លោក សម រង្ស៊ី ជាការស្ទង់ការគាំទ្រជាមុនសិន ។ យ៉ាងណា ប្រសិនមានការគាំទ្រច្រើន នោះលោក សម រង្ស៊ី នឹងមក តើបើមិនច្រើននោះទេ លោក សម រង្ស៊ី អាចនឹងមិនទាន់មកក៏ថា ។
ក៏ប៉ុន្តែ ទាំងលោក សម រង្ស៊ី និងមន្ត្រីអតីតគណបក្សសង្គ្រោះជាតិដែលកំពុងតែធ្វើនយោបាយនៅបរទេស ថានឹងវិលចូលកម្ពុជាតាមការកំណត់ជាដាច់ខាត មិនអាចពន្យាបានឡើយ ។ លោក សម រង្ស៊ីថា ប្រជាជនកម្ពុជាកំពុងតែរង់ចាំលោកយ៉ាងអន្ទះសារ ដើម្បីឱ្យលោកសោះស្រាយបញ្ហាដែលកម្ពុជាកំពុងតែជាប់គាំង ឬបញ្ហាដែលរាជរដ្ឋាភិបាលបង្កើតឡើង ។
លោក សម រង្ស៊ីថា លោកនឹងនាំប្រជាជនកម្ពុជាមិនតិចជាងលាននាក់នោះទេ មកកម្ពុជាជាមួយលោក រួមទាំងអន្តរជាតិមួយចំនួនទៀតផង ។
តែយ៉ាងណា រាជរដ្ឋាភិបាលកម្ពុជាតាមរយៈមន្ត្រីជាន់ខ្ពស់ថា មិនស្វាគមន៍ចំពោះអន្តរជាតិណាដែលមកជាមួយលោក សម រង្ស៊ីនោះទេ ។ សម្ដេចនាយករដ្ឋមន្ត្រីប្រកាសស្វាគមន៍លោក សម រង្ស៊ី ហើយក៏រំលឹកម្ដងហើយម្ដងទៀតថា គុកនៅស្វាគមន៍ ។ កន្លងមកទៀតសោត នាយករដ្ឋមន្រ្តីកម្ពុជាថា អាជ្ញាត្រៀមកំចាត់ក្រុមលោក សម រង្ស៊ី ដែលមន្ត្រីកម្ពុជាហៅថា ជាភារវករនយោបាយរួចរាល់ហើយដែរ ។
កម្ពុជា និងទំនាក់ទំនងកាទូត
ប្រទេសកម្ពុជាជាប្រទេសដែលផ្ដល់សច្ចាប័ន និងជាប្រទេសហត្ថលេខី នៃសន្ធិសញ្ញាសន្តិភាពទីក្រុងប៉ារីស ២៣ តុលា ១៩៩១ ។
យ៉ាងណា ប្រទេសហត្ថលេខីនៃសន្ធិសញ្ញានេះ អាចនឹងចូលខ្លួន ចរចាឱ្យកម្ពុជាអនុវត្តន៍ ដើម្បីឱ្យកម្ពុជាដើរតាមស្មារតីនៃការបង្កើតសន្ធិសញ្ញានេះឡើងមក ។
កម្ពុជាក៏ផ្ដល់សច្ចាប័នដល់ច្បាប់អន្តរជាតិជាច្រើនទៀត ដើម្បីធានាថា កម្ពុជា​មិនរំលោភសិទ្ធិមនុស្ស ។
មិនត្រឹមតែប៉ុណ្ណោះ កម្ពុជាក៏មាននយោបាយការទូត ឬនយោបាយការបរទេស ដែលធ្វើឱ្យប្រទេសនេះមានទំនាក់ទំនងជាមួយបណ្ដាប្រទេសផ្សេងទៀត នៅក្នុងតំបន់ និងក្រៅតំបន់ ។
ក្នុងនាមជាប្រទេសមួយដែលជារដ្ឋសមាជិកនៃអង្គការសហប្រជាជាតិ ត្រូវប្រកាន់នូវខ្ជាប់នូវលក្ខខ័ណ្ឌរបស់អង្គការអន្តរជាតិនេះ ដែលការបង្កើតអង្គការអន្តរជាតិនេះឡើង ដើម្បីឱ្យមានសន្តិភាពពិភពលោក ។
ក្រៅពីនយោបាយការបរទេស កម្ពុជាក៏មានទំនាក់ទំនងពាណិជ្ជកម្មជាមួយបណ្ដាប្រទេសដែលមានការរីកចម្រើនផ្នែកសេដ្ឋកិច្ច ដូចជាអាមេរិក និងសហភាពអឺរ៉ុប និងចិនជាដើម ។
គេសង្កេតឃើញថា សហភាពអឺរ៉ុប និងសហរដ្ឋអាមេរិក ដែលជាទីផ្សារដ៏ធំសម្រាប់កម្ពុជានាំចូលទំនិញ និងផ្ដល់ការអនុគ្រោះពន្ធជាច្រើនដល់កម្ពុជានោះ បានបង្ហាញការខ្វាយខ្វល់ចំពោះស្ថានភាពនៃការអនុវត្តលទ្ធិប្រជាធិបតេយ្យនៅកម្ពុជា ។
ទំនងដោយសារតែមើលឃើញថា ស្ថានភាពនៃការអនុវត្តន៍ប្រជាធិបតេយ្យនៅកម្ពុជា មានការធ្លាក់ចុះក្រោយការបោះឆ្នោតសភានីតិកាលទី ៦ សហរដ្ឋអាមេរិក និងសហភាពអឺរ៉ុប បានទទួចឱ្យកម្ពុជាស្ដារឡើងវិញនូវលទ្ធិប្រជាធិបតេយ្យ ការគោរពសិទ្ធិមនុស្ស និងនីតិរដ្ឋ ។
យ៉ាងណា ការទទួចនេះ បានធ្វើឡើងម្ដងហើយម្ដងទៀត តែហាក់ដូចជាមិនបានដូចចិត្ត ។ ចំពោះកម្ពុជាជាប្រទេសសាម៉ីវិញ ដែលត្រូវបានអន្តរជាតិថា មិនមានប្រជាធិបតេយ្យ នៅតែប្រកាន់ជំហរដដែល ថាកម្ពុជាមិនមែនដូចអន្តរជាតិទាំងនេះវាយតម្លៃនោះទេ ។
សមាជិករាជរដ្ឋាភិបាលកម្ពុជា ថាកម្ពុជាជារដ្ឋឯករាជ្យ មានរាជរដ្ឋាភិបាលស្របច្បាប់បានមកពីការបោះឆ្នោតស្របទៅតាមច្បាប់ មានពលរដ្ឋបោះឆ្នោតរហូតដល់ទៅជាង ៨០ % ។
ដោយការសន្មតថាកម្ពុជា គឺរាជរដ្ឋាភិបាលបានអនុវត្តន៍ប្រជាធិបតេយ្យបានល្អប្រសើរហើយនោះ ទើបមន្ត្រីស្ទើរគ្រប់ជាន់ថ្នាក់ ជាពិសេសគឺនាយករដ្ឋមន្ត្រីផ្ទាល់ថា កម្ពុជាមិនអាចធ្វើតាមការទទួចរបស់អន្តរជាតិនោះទេ ។
យ៉ាងណា ការទទួចរបស់សហរដ្ឋអាមេរិក និងសហភាពអឺរ៉ុបនោះ ធ្វើឡើងជាថ្នូរទៅនឹងការទទួលបានការអនុគ្រោះពន្ធ និងទណ្ឌកម្មផ្សេងទៀត ។ តែកម្ពុជាថា របស់ទាំងនេះ មិនដូរជាមួយអធិបតេយ្យកម្ពុជានោះទេ ។
ខណៈពេលនេះមានការព្រួយបារម្ភថា ទំនាក់ទំនងការទូតកម្ពុជាអាចនឹងមានការធ្លាក់ចុះជាមួយសហរដ្ឋអាមេរិក និងសហភាពអឺរ៉ុប ។ សហរដ្ឋអាមេរិក និងសហភាពអឺរ៉ុប ជាបណ្ដាប្រទេសដែលគេទទួលស្គាល់ថា ជាប្រទេសមានប្រជាធិបតេយ្យពេញលេញ ។
ជាងនេះទៅទៀត គេក៏ទទួលស្គាល់ថា ប្រទេសទាំងនេះនឹងធ្វើអន្តរាគមន៍ ដើម្បីឱ្យមានប្រជាធិបតេយ្យនៅប្រទេសដទៃ ក្នុងនោះក៏អាចនឹងមានកម្ពុជាផងដែរ ។
ជាក់ស្ដែង បណ្ដាសមាជិកសភា របស់សហភាពអឺរ៉ុមួយចំនួន បានបង្ហាញជំហ ថានឹងអមដំណើរជាមួយលោក សម រង្ស៊ី មកកម្ពុជា ដើម្បីឱ្យមានប្រជាធិបតេយ្យ ។ រដ្ឋសភាសហរដ្ឋអាមេរិក បានអនុម័តច្បាប់ស្ដីពីប្រជាធិបតេយ្យនៅកម្ពុជា ដើម្បីដាក់ទណ្ឌកម្មលើមន្ត្រីកម្ពុជា ដែលប្រទេសនេះគិតថា ជាមន្ត្រីដែលចូលរួមបំផ្លាញប្រជាធិបតេយ្យនៅកម្ពុជា ។

បើមានវត្តមានលោក សម រង្ស៊ី ដោយផ្ទុះឡើងនូវហឹង្សា តើនរណាជាអ្នកចេញមុខអន្តរគមន៍ ?
ចំពោះការវិលចូលកម្ពុជាវិញ របស់ក្រុមលោក សម រង្ស៊ី រាជរដ្ឋាភិបាលកម្ពុជា បានបញ្ជាឱ្យអាជ្ញាធរប្រុងប្រៀបដើម្បីចាប់លោក សម រង្ស៊ី​មកអនុវត្តទោស ឬដោយមានការបង្ក្រាបដោយកម្លាំង ។ ការណ៍នេះ អាចនឹងមានផ្ទុះហឹង្សា រវាងអាជ្ញាធរ នឹងក្រុមលោក សម រង្ស៊ី និងប្រជាពលរដ្ឋអ្នកគាំទ្រ ប្រធានស្ដីទីនៃអតីតគណបក្សសង្រ្គោះជាតិរូបនេះ។
ប្រសិនបើមានការផ្ទុះហឹង្សាមែននោះ ទំនងជាអាចនឹងធ្វើឱ្យសហរដ្ឋរដ្ឋអាមេរិក នឹងសហភាពអឺរ៉ុបបន្ថែមការចោទថា កម្ពុជា រំលោភសិទ្ធិមនុស្ស និងប្រជាធិបតេយ្យកាន់តែខ្លាំង ។
បើយើងក្រឡេកទៅមើលស្ថានភាពនៅប្រទេសវេណេហ្សូអេឡា នៅពេលដែលោក ជួន ហ្កៃដូរ វិលត្រឡប់ចូលប្រទេសវិញ ក្រោមការគម្រាមពីលោក នីកូឡាស់ម៉ាឌូរ៉ូ ប្រធានាធីបតីសព្វថ្ងៃនៃប្រទេសនេះថា នឹងចាត់វិធានការកម្ចាត់ក្ដី ។ យ៉ាងណា ខណៈពេលដែលលោក ហ្កៃដូ ចូលវេណេហ្សូអេឡាមែននោះ ម៉ាឌូរ៉ូ មិនអាចធ្វើបានទេ ដោយនៅពីក្រោយមេបក្សប្រឆាំងនេះ មានអន្តរជាតិមួយចំនួនគាំទ្រលោក មានដូចជា អាឡឺម៉ង់ អាមេរិក ឈីលី អេស្ប៉ាញ កាណាដា និងដាណាម៉ាកជាដើម ។
ដោយឡែកចំពោះកម្ពុជា ប្រសិនបើមានហឹង្សាផ្ទុះឡើងមែននោះ ឯកអគ្គរដ្ឋទូតថ្មីប្រចាំកម្ពុជា លោក Partrict murphy និងមន្ត្រីទូតមួយចំនួន របស់សហភាពអឺរ៉ុប ទំនងនឹងធ្វើអន្តរាគមន៍លើបញ្ហាទាំងនេះ ។
ជាងនេះទៀត ក្រៅពីអន្តរជាតិ ព្រះមហាក្សត្រកម្ពុជា ក៏អាចនឹងធ្វើអន្តរាគមន៍ផងដែរ ។
បើតាម មាត្រា​ ៨ នៃរដ្ឋធម្មនុញ្ញកម្ពុជា ចែងថា «ព្រះមហាក្សត្រ​ ព្រះ​អង្គ​ទ្រង់​ជា​និមិត្ត​រូប​នៃ​ឯកភាព​ជាតិ​ និង​ និរន្តរភាព​ជាតិ។
ព្រះមហាក្សត្រ​ ទ្រង់​ជា​អ្នក​ធានា​ឯករាជ្យ​ជាតិ​ អធិបតេយ្យ​ និង​បូរាណ​ភាព​ទឹកដី​ នៃ​ព្រះរាជាណាចក្រ​កម្ពុជា​ ទ្រង់​ជា​​អ្នក​ធានា​ការ​គោរព​សិទ្ធិ​ និង​សេរីភាព​​របស់​ប្រជាពលរដ្ឋ​ និង ​ការ​គោរព​សន្ធិសញ្ញា​អន្តរជាតិ » ។
បើគ្មានហឹង្សាផ្ទុះឡើង ពេលមានវត្តមានលោក សម រង្ស៊ី
ក៏ប៉ុន្តែ ប្រសិនបើមិនមានការចាប់លោក សម រង្ស៊ី មិនមានផ្ទុះឡើងនូវហឹង្សាទេនោះ អាចជារឿងវិជ្ជមានល្អណាស់សម្រាប់កម្ពុជា ។
ការណ៍នេះអាចនឹងធ្វើឱ្យកម្ពុជាមានការចរចានយោបាយឡើងវិញ ដើម្បីដោះស្រាយវិបត្តិនយោបាយនៅកម្ពុជា ។
កិច្ចចរចា អាចនឹងធ្វើទៅបាន ក្រោមការព្រមព្រៀងពីគណបក្សទាំងពីរ ឬមានការរៀបចំពីសហភាពអឺរ៉ុប ឬអាមេរិក ។
យ៉ាងណា ការណ៍នេះ ជាការធ្វើឱ្យកម្ពុជាអាចរក្សាបាននូវការអនុគ្រោះពន្ធពីសហភាពអឺរ៉ុប ក្រោមក្របខ័ណ្ឌគ្រប់មុខទំនិញទាំងអស់លើកលែងអាវុធ និង ការនាំចូលទំនិញទូទៅទៅសហអាមេរិក ។ ជាងនេះ កម្ពុជាក៏បន្ថែមមុខមាត់លើឆាកអន្តរជាតិ ៕

The post វិភាគ៖ ពេលលោក សម រង្ស៊ី មកដល់កម្ពុជា ប្រសិនបើមានផ្ទុះហឹង្សាកើតឡើង តើអ្នកណាអន្តរាគមន៍? appeared first on WMC.

លោក Omar Al Bashir ដែលត្រូវប្រជាជននិងកងទ័ពស៊ូដង់អូសចេញពីអំណាចកាលពីថ្ងៃទី១១មេសា២០១៩ ត្រូវបាននាំខ្លួនមកអង្គុយក្នុងរង្វង់ក្រចកសេះឱ្យស្ដាប់អំពីបទចោទប្រឆាំងនឹងមេដឹកនាំរូបនេះ។តុលាការប្រជាជនបានចោទលោកAl Bashir ពីបទពុករលួយលួចកឹបកេងទ្រព្យសម្បត្តិរដ្ឋក្នុងតម្លៃ១១៣លានដុល្លារ។ក្រៅពីបទចោទនេះ បុរសខ្លាំងរូបនេះរងបទចោទបំពានអំណាចរដ្ឋរំលោភសិទ្ធិមនុស្សនិងការសម្លាប់មនុស្សក្រៅប្រព័ន្ធ។ប្រជាជនស៊ូដង់ប្រកាសថាពួកគេមានការសាទរនឹងការទទួលបានយុត្តិធម៌មកវិញក្រោយពីពួកគេបាត់បង់នៅក្នុងអំឡុង៣០ឆ្នាំនៃការកាន់អំណាចរបស់បុរសខ្លាំងម្នាក់នេះ។

ដើម្បីជ្រាបសូមស្ដាប់ការបកសរ្ាយរបស់លោកនួនបូរិនតាមរយៈការចោទសួររបស់លោកសោមលាភដូចតទៅ៖

The post ជនផ្ដាច់ការស៊ូដង់ក្រោយពីធ្លាក់ពីអំណាចមានទោសពុករលួយនឹងក្បត់ជាតិ appeared first on WMC.

ប្រទេសនៅអាស៊ីអាគ្នេយ៍ដែលធំគ្រប់យ៉ាងទាំងចំនួនប្រជាជននិងផ្ទៃដីបានរៀបចំខ្លួនជាស្រេចផ្លាស់ប្ដូររដ្ឋធានីរបស់ខ្លួនពីទីក្រុងចាកាតា។ប៉ុន្ដែប្រមុខរដ្ឋាភិបាលនៃ ប្រទេសនេះត្រូវធ្វើការបញ្ចុះបញ្ចូលជាច្រើនដងក្នុងសភាពីរឿងនេះ។ ម្យ៉ាងរឿងនេះមិនមែនតែកើតនៅឥណ្ឌូនេស៊ី មានប្រទេសជាង៤០ហើយបាន ប្ដូររដ្ឋធានី។

កញ្ញា ឆោម ពៅនិកា ជូនសេចក្ដីប្រែសម្រួល

ហោចណាស់មានប្រទេសចំនួនជាង៤០បានផ្លាស់រដ្ឋធានីថ្មី។ឥណ្ឌូនេស៊ីជាប្រទេសទីមួយដែលយើងលើកយកមនិយាយក្នុងអត្ថបទនេះ។រដ្ឋធានីចាកាតាលើកោះជ្វាដ៏ល្បាញល្បីជាប់ជាទីក្រុងដែលមានចរាចរណ៍កកកុញមិនដាច់មួយនាទី ដែលនឹងត្រូវយកឈ្មោះរដ្ឋធានីនេះទៅបំពាក់នៅកោះប៉ូណេអូ ជារដ្ឋធានី កាឡាម៉ាន់តាន់ទៅវិញ។កាលពីថ្ងៃទី១៦សីហា លោកប្រធាំនាធិបតី ចូកូវីដូដូ បានធ្វើសុន្ទរកថាមិនដាច់ពីលើរឿងនេះក្នុងសភា។

តាមពិតទៅមូលហេតុនៃការផ្លាស់ប្ដូររដ្ឋធានីចាកាតាគឺជារឿងមិនពាក់ព័ន្ធនឹងសម្ពាធខាងក្រៅ ឬ ភូមិសាស្រ្ដនយោបាយនោះទេ តែជាសំខាន់គឺទាក់ទងទៅនឹងភូមិ សាស្រ្ដធម្មជាតិនិរន្ដភាពនៃរដ្ឋធានីនេះទៅវិញ។ របាយការណ៍សារព័ត៌មាន BBC ថា រដ្ឋធានីចាកាតា កំពុងលិចជាមធ្យមពី ១តឹកកន្លះក្នុងមួយឆ្នាំៗ។ ស្ទើរតែពាក់កណ្តាលនៃទីក្រុងឥឡូវនេះលិចលង់ក្រោមកម្រិតទឹកសមុទ្រ។

វិបត្តិទីពីរគឺគមនាគមន៍ដ៏ស្អិតរមួយត៖ ក្នុងឆ្នាំ២០១៦ ការស្ទង់មតិមួយវាយ តម្លៃថាទីក្រុងដ៏ធំនេះគឺមានការកកស្ទះចរាចរណ៍អាក្រក់ជាងគេ។ ការប្រជុំរដ្ឋមន្រ្ដីម្ដងណាក៏ដោយ​ត្រូវតែមានការអមការពារដោយក្បូនទើបអាចទាន់ ពេលវេលាបាន។ក្នុងឆ្នាំ២០១៧  ប្រជាពលរដ្ឋឥណ្ឌូនេស៊ីមានចំនួន២៦៤លាន។ ចាកាតាដែលមានផ្ទៃដី 661.5 km² មានពលរដ្ឋសរុប៣០លាននាក់បាត់ទៅហើយ។ ចំណែកការទុកដាក់សំរាមរាវវិញ របាយការណ៍បញ្ជាក់ថាមានភាពឥតសណ្ដាប់ធ្នាប់ ជាខ្លះ ប្រមាណតែ២ទៅ៤ភាគរយនៃការទុកដាក់សំរាមរបស់ពលរដ្ឋបានត្រឹមត្រូវ។ ដូចបានជ្រាបហើយថា រដ្ឋធានីថ្មីដែលនឹងត្រូវបានដូរទៅរបស់ឥណ្ឌូនេស៊ីគឺកាឡាម៉ាន់ តាន់ នៃកោះបូណេអូ។ ការប្ដូររដ្ឋធានីនេះជាការសម្រេចចិត្តដ៏តានតឹងដែលនឹងត្រូវចំណាយថវិកាជាតិប្រមាណ៣៣ពាន់លានដុល្លារ លើផ្ទៃដី៣ម៉ឺនទៅ៤ម៉ឺនហិចតាសម្រាប់ដែលមានលំនៅដ្ឋានស្រាប់ចំនួន៩០០ពាន់ខ្នងនិងប្រជាជន១លានប្រាំសែននាក់។ កាលីម៉ាន់តាន់នេះ អតីតប្រធានាធិបតីប្រជាធិប តេយ្យនិយម ស៊ូកាណូក៏ធ្លាប់មានបំណងរើសយកជារដ្ឋធានីផងដែរ។

ចំណែក ប្រទេសKazakhstan  នៃទ្វីបអាស៊ីកណ្ដាលក្នុងឆ្នាំ១៩៩៧ ក្នុងរបបដឹកនាំរបស់លោកNursultan Nazarbayev បានសម្រេចដូររដ្ឋធានី ដ៏ធំឈ្មោះថាAlmaty ដែលមានផ្ទៃដីសរុប៦៨២គីឡូម៉ែត្រការ៉េប្រហែល នឹងចាកាតាដែរនោះទៅកាន់ក្រុងនៅភាគខាងជើង១២០០គីឡូម៉ែត្រពីគ្នាឈ្មោះថា Astanav វិញ។ លោកប្រធានាធិបតីកាលណោះបានផ្ដើមគំនិតស្ថាបនា ទីក្រុងថ្មីដោយពាំនាំស្ថាបត្យករល្បីៗនៅជុំវិញពិភពលោកឱ្យយោបល់លឺរឿងនេះ។ទីបំផុត Astana ដែលជារដ្ឋធានីរូងស បានក្លាយជាកន្លែងដែលគួរឱ្យចាប់អារម្មណ៍ បំផុតមួយមានតង់យក្សមួយជាអត្តសញ្ញាណដែលរចនាដោយ Norman Foster ជាផ្សារទំនើបនិងកន្លែងកម្សាន្ដដ៏ធំមហិមា។

ការផ្លាស់ប្ដូររដ្ឋធានីអស់រយៈពេល២១ឆ្នាំបានធ្វើឱ្យ កាហ្សាស្ដាមានកំណើនសេដ្ឋកិច្ចកើនឡើងក្នុងឆ្នាំ២០១៨ ប្រមាណ៤.៨ភាគរយ។ជាកិត្តិយសនៃការលើកកម្ពស់កិត្យានុភាពជាតិ ឈ្មោះប្រធានាធិតី Nazarbayev បានក្លាយជាឈ្មោះទីក្រុងមួយផងដែរ។

ប្រទេសទីបីដែលលើកយកពិភាក្សាគឺ ស្ថិតនៅអាស៊ីអាគ្នេយ៍មួយទៀត នោះគឺប្រទេស​មីយ៉ាន់ម៉ា។

ទីក្រុងណៃពីដោ មានផ្ទៃដីធំជាងក្រុងឡុងដុងចក្រភពអង់គ្លេសដល់ទៅបួនដង។ បើតាមភាសាម៉ីយ៉ាន់ម៉ា ណៃពីដោ ប្រែសេចក្ដីថា រាជបល្ល័ង្គ។ យ៉ាងណា ការផ្លាស់ប្ដូររដ្ឋធានីពីរ៉ង់ហ្គូនទៅកាន់ ណៃពីដោហា់ក់មានភាពស្មុគស្មាញក្នុងរបបដឹកនាំយោធាផ្ដាច់ការលោក ថាន់ស្វេ ។តែគឺមកអំពីលក្ខណៈយុទ្ធសាស្រ្ដទីតាំងច្រើនជាងការសិក្សាពីលក្ខណៈភូមិសាស្រ្ដធម្មជាតិ និង​មនុស្ស។ មានការវិភាគថា ការប្ដូរដ្ឋធានីគឺមកពីពួកយោធាភ័យខ្លាចការលុកលុយបរទេសឬចង់គ្រប់គ្រងលើជនជាតិភាគតិចនៅតាមតំបន់ព្រំដែនក្រោយពួកគេដណ្តើមកាន់កាប់ក្រុងដាម៉ាន។តែមានពាក្យចចាមអារ៉ាមថា ហោរាសាស្ដ្ររបស់នាយឧត្តមសេនីយ៍បានប្រាប់លោកឱ្យប្ដូររដ្ឋធានីដើម្បីរក្សាអំណាចបានយូរ។ ជាការពិត ពលរដ្ឋមីយ៉ាន់ម៉ានិង ទាំងឧត្តមសេនីយ៍ Shwe មានទំនោរជឿលើការព្យាករណ៍របស់ហោរាសាស្ដ្រ។ តែអ្នកសេដ្ឋកិច្ចនៃប្រទេសនេះថា កត្តាសេដ្ឋកិច្ចជារឿងសំខាន់ រដ្ឋាភិបាលយោធាហាក់ដូចជាជឿជាក់ប្រសិនបើពួកគេរើរដ្ឋធានីទៅកណ្ដាលប្រទេសពួកគេអាចគ្រប់គ្រងលំហូរសេដ្ឋកិច្ចពីទេសចរណ៍រដ្ឋធានីបុរាណនិងផលិតផល។

ស្ថិតនៅអាមេរិកខាងត្បូង ប្រទេសបូលីវៀ មានការយល់ច្រឡំថា មានទីក្រុងរដ្ឋធានីដល់ទៅពីរ គឺ Sucre និង La Paz តែតាមពិតមិនដូច្នេះទេ ទោះធ្លាប់ជារដ្ឋធានីតាំងពីឆ្នាំ១៨២៥មកតែពេលនេះមានប្រជាជនរស់នៅត្រឹមតែ ២៥ ម៉ឺននាក់ប៉ុណ្ណោះបើប្រៀបធៀបទៅនឹង ១,៧ លាននាក់នៅឡាប៉ាស។ Sucre ដើមឡើយបានក្លាយជារដ្ឋធានីរបស់បូលីវីក្នុងឆ្នាំ ១៨៣៩ ដែលជាជំរើសដ៏សមហេតុផលមួយដែលឆ្លុះបញ្ចាំងពីទីតាំងរបស់ទីក្រុងដែលជាចំណុចក្តៅនៃសកម្មភាពបដិវត្តដំបូងនិងជាមធ្យោបាយងាយស្រួលសម្រាប់ឈានទៅរករ៉ែដ៏សំបូរបែបរបស់ប្រទេស។ ទោះយ៉ាងណានៅឆ្នាំ ១៨៩៨ ប្រាក់ភាគច្រើនបានរីងស្ងួតហើយមនុស្សជាច្រើនចង់រើរាជធានីទៅឡាប៉ាហ្សាដែលនៅជិតនឹងទុនបម្រុងសំណប៉ាហាំងដ៏មានតម្លៃរបស់ប្រទេស។ សង្រ្គាមស៊ីវិលបានផ្ទុះឡើងជុំវិញការផ្លាស់ប្តូរដែលបានស្នើឡើងដូច្នេះការសម្របសម្រួលត្រូវតែមានជាចាំបាច់។ ឡាប៉ាហ្សាបានក្លាយជារដ្ឋធានីរដ្ឋបាលរបស់ប្រទេសនេះខណៈដែលស៊ូរ៉េរក្សាតួនាទីជារដ្ឋធានីរដ្ឋធម្មនុញ្ញនិងតុលាការ។

នៅឯទ្វីបអាហ្រ្វិចឯណោះវិញ នីហ្សេរីយ៉ា មានការប្ដូររដ្ឋធានីដូចគ្នាដោយជឿជាក់ថា ដើម្បីសេដ្ឋកិច្ចប្រទេសជាតិច្រើនជាងគឺទៅកាន់ឆ្នេរសមុទ្រនីហ្សេរីយ៉ា បន្ទាប់ពីឡាកូសជារដ្ឋធានីដែលមានភាពរកាំនយោបាយដោយសង្គមមនុស្ស ជាងនេះ Lagos មានភាពកកស្ទះដោយកំណើនប្រជាពលរដ្ឋក្នុងទីក្រុងទើបមានការសម្រេចចិត្តស្វែងរកដីថ្មីនៃរដ្ឋធានីចម្ងាយពីរដ្ឋធានីចាស់ ១៦០០គីឡូម៉ែត្រទៅកាន់ Abuja វិញ។

មែនទែនទៅមានរដ្ឋអធិបតេយ្យជាង៤០មកហើយក្នុងចំណោមរដ្ឋអធិបតេយ្យ១៩៥បានប្ដូររដ្ឋធានីរបស់ខ្លួន។ការប្ដូររដ្ឋធានីនីមួយៗសុទ្ធតែសបញ្ជាក់ពីបញ្ហារកាំ បំផុតនៃនយោបាយ សេដ្ឋកិច្ច សង្គម​និងការវិវត្តចុងក្រោយនៃបរិស្ថាន ព្រមទាំងមានការដាក់ក្ដីសង្ឃឹមលើយុទ្ធសាស្រ្ដទីទ័លរបស់រដ្ឋាភិបាលដោយថានឹងមានភាពរុងរឿងក្រោយពីកសាងមូលដ្ឋានមជ្ឈឹមអំណាចថ្មី៕

The post ហេតុអ្វីប្រទេសខ្លះសម្រេចប្ដូរទីតាំងរដ្ឋធានី? appeared first on WMC.

កំពង់ធំ៖ ស្រ្តីមេផ្ទះ និងយុវតីខ្មែរឥស្លាម រស់នៅក្នុងភូមិដូនប៉ែន ឃុំបឹង ស្រុកបារាយណ៍ ខេត្តកំពង់ធំ ប្រមាណ ៥០គ្រួសារ មានជំនាញដេរសំណាញ់លក់ តាមការកាម៉ុងរបស់ម៉ូយនៅតាមខេត្ត។

ស្រ្តីទាំងនេះឆ្លៀតពេលដេរសំណាញ់លក់នៅពេលទំនេរពីការងារផ្ទះ និងការសិក្សា។ស្រ្តីមេផ្ទះមួយរូបបានប្រាប់ថា សំណាញ់មួយអាចដេររួចក្នុងរយៈ ២ ទៅ ៤ថ្ងៃ គឺតាមពេលទំនេរច្រើនឬតិច។

ចំណែកកម្រៃវិញទទួលបានពី១២ ០០០រៀល ទៅ ២០ ០០០រៀលក្នុងមួយសំណាញ់។ការងារដេរសំណាញ់នេះ ជាមុខរបរបន្ទាប់បន្សំអាចជួយរកប្រាក់ចំណូលបាន ដោយមិនពឹងលើកម្លាំងប្តីទាំងស្រុង។

ចំណែកយុវតីមួយរូបប្រាប់ថា នាងអាចយកប្រាក់ពីការដេរសំណាញ់នេះទៅផ្គត់ផ្គង់ការសិក្សារបស់ខ្លួនបាន ដោយមិនចាំបាច់ពឹងលើឳពុកម្តាយ។ យុវតីរូបនេះបន្តថា នាងចេះដេរសំណាញ់នេះពីឳពុកម្តាយរបស់នាង៕

The post ស្រ្តីខ្មែរឥស្លាមឃុំបឹងចេះដេរសំណាញ់លក់រកកម្រៃបន្ថែមផ្គត់ផ្គង់គ្រួសារ appeared first on WMC.

កំពង់ធំ៖ កាលពីពេលថ្មីៗនេះប្រជាពលរដ្ឋភូមិបឹង ឃុំបឹង ស្រុកបារាយណ៍ ខេត្តកំពង់ធំ បានរៀបចំពិធីដាក់អោយប្រើប្រាស់កាចាក់បេតុងនៅក្នុងខ្ទមអ្នកតានៅភូមិបឹង បន្ទាប់ពីពលរដ្ឋក្នុងភូមិបានប្រមូលថវិកាគ្នាទៅសង់។ ការរៃអង្គាសថវិកាគ្នាយកទៅចាក់បេតុងនេះ គឺដើម្បីកែលម្អផ្លូវឱ្យងាយស្រួលធ្វើដំណើរ និងមានសោភ័ណភាពស្អាតក្នុងភូមិ។

លោកតា អន គណៈកម្មាធិកាវត្តបឹងខាងត្បូងនិយាយថា ផ្លូវមួយខ្សែកាត់មុខខ្ទមអ្នកតានេះ ចំណាយថវិកាសាងសង់សរុប ៣ ៦៥៣ ៥០០រៀល ហើយផ្លូវនេះមានទំហំ ១១ គុណ ១៦ ម៉ែត៕

អត្ថបទខ្លីសរសេរដោយ ថាន់ ស្រីណាង យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។

The post ពលរដ្ឋឃុំបឹងសម្ពោធប្រើប្រាស់ផ្លូវបេតុងមួយខ្សែក្រោយប្រមូលថវិការួមគ្នាសាងសង់ appeared first on WMC.

ប្រទេសសមាជិកអាស៊ាន នឹង​ធ្វើ​សមយុទ្ធ​យោធា​លើក​ដំបូង​​ជាមួយ​កង​ទ័ព​ជើង​ទឹក​សហរដ្ឋ​អាមេរិក  ខណៈអាមេរិកនិងចិនកំពុងដណ្ដើមឥទ្ធិពល ក្នុងតំបន់។ សម្រាប់កម្ពុជា គឺជា​សមាជិក​មួយនៃសមាគមនេះដែរតែ កម្ពុជាមិនទាន់​ឃើញ​​ឆ្លើយថាត្រូវចូលរួមសមយុទ្ធនៅឡើយទេ។

កញ្ញា អុំ ច័ន្ទលក្ខិណា រាយការណ៍៖

សមយុទ្ធ​នេះ​នឹង​ត្រូវ​ធ្វើនៅ​ក្នុង​តំបន់​ឈូង​សមុទ្រថៃ តំបន់​ច្រក​សមុទ្រ​ម៉ាឡាកា ក្បែរ​ប្រទេស​ម៉ាឡេស៊ី និង​តំបន់​សមុទ្រ​ក្បែរ​ប្រទេស​វៀតណាម។សមយុទ្ធ​យោធា​នេះ ​មាន​នាវា​ចំនួន ៨គ្រឿង និង​យន្តហោះ​ចម្បាំង ២គ្រឿង ដោយនៅ​ចាប់ផ្ដើមពីថ្ងៃទី២ដល់ថ្ងៃទី ៦ កញ្ញា ។

នេះ​បើ​តាម​សេចក្តី​ថ្លែងការណ៍​របស់​ក្រសួង​ការពារ​ជាតិ​ថៃ កាល​ពីថ្ងៃ​ទី២៣ សីហា​ដែលស្រង់មកចុះផ្សាយដោយ គេហទំព័រ  Rappler.com ។

តាមប្រភពដដែលនេះ សមុទ្ធទ័ពជើងទឹក​រួម​គ្នា​លើក​ទីមួយ​​រវាង​ប្រទេស​សមាជិក​អាស៊ាន​ទាំង១០ និង​អាមេរិក​នេះ ធ្វើ​ឡើង​ក្នុង​គោល​បំណង​បង្កើត​កិច្ច​សហប្រតិបត្តិការ​ទៅ​វិញ​ទៅ​មក​លើ​ការ​កសាង​សន្តិសុខ​លំហ​សមុទ្រ និង​ផ្តោត​ជា​សំខាន់​លើ​ការ​បង្ការ និង​បង្រ្កាប​សកម្មភាព​ល្មើស​ច្បាប់​​ផ្សេងៗ នៅ​លើផ្ទៃ​​សមុទ្រ។ សមាជិក​ដែល​ចូល​រួម​ក្នុង​សមយុទ្ធ​យោធា​នេះ នឹង​ចែក​រំលែក​ព័ត៌មាន បង្កើន​ការ​ស្វែង​យល់ និង​សហការ​គ្នា​ក្រោម​ច្បាប់​អន្តរជាតិ និង​ច្បាប់​របស់​ប្រទេស​នីមួយៗ។

វិទ្យុស្ត្រីបាន ព្យាមយាមទាក់ទងទៅលោកឧត្តមសេនីយ៍ឈុំសុជាតិ អ្នកនាំពាក្យក្រសួងការពារជាតិ តែពុំមានការលើក​ទូរស័ព្ទ ។តែអ្នកនាំពាក្យរាជរដ្ឋាភិបាល គឺលោកផៃស៊ីផានថា មិនស្ថិតក្នុងសមត្ថកិច្ចរបស់លោក​រឿង​នេះ។

កម្ពុជា បានដកខ្លួនពីការធ្វើសមយុទ្ធយោធាជាមួយអាមេរិក គឺនៅឆ្នាំ២០១៦ ហើយក្រោយមកកម្ពុជា ទទួលយកការ​ធ្វើសម​យុទ្ធជាមួយចិនជំនួសអាមេរិក។

អ្នកវិភាគម្នាក់គឺលោក ឯម សុវណ្ណារ៉ា យល់ថា សមុយុទ្ធនេះ គឺជាការបង្ហាញពី ការរឹតចំណងទាក់ទង រវាងកងទ័ពអាមេរិក និងប្រទេសសមាគមអាស៊ាន ដែលលោកថៃ ក្ដី គឺគេចង់ប្រាប់ថាគេធ្វើសមយុទ្ធដូច​បានទាំង​អាមេរិក និងចិនគឺមិនដូចកម្ពុជា ធ្វើបានតែជាមួយចិននោះទេ។

តំបន់​អាស៊ី​អាគ្នេយ៍​បាន​ក្លាយ​ជា​ទីតាំង​​ប្រជែង​ឥទ្ធិ​ពល​គ្នា​ដ៏​ស្រួច​ស្រាល់​រវាង​មហាអំណាច​កុម្មុយនីស្ត​​ចិន និង​សហរដ្ឋ​អាមេរិក។

ក្រុង​ប៉េកាំង​បាន​ពង្រីក​ឥទ្ធិពល​របស់​ខ្លួន​កាន់​តែ​ខ្លាំង​លើ​តំបន់​មួយ​​នេះ​ តាម​រយៈ​ការ​ដាក់​ចេញ​​នូវ​យុទ្ធសាស្ត្រ “ខ្សែ​ក្រវ៉ាត់ និង​ផ្លូវ” ស្រប​ពេល​​សហរដ្ឋ​អាមេរិក​បាន​ព្យាយាម​រាំង​ខ្ទប់​ឥទ្ធិពល​របស់​​ចិន​​ ដោយ​អនុវត្ត​យុទ្ធសាស្រ្ត “ឥណ្ឌូប៉ាស៊ីហ្វិក”។

 ប្រទេស​មួយ​ចំនួន ដូច​ជា កម្ពុជា និង​ឡាវ ជា​ដើម តែង​​​ចេញ​មុខ​គាំទ្រ​ និង​ការពារ​ផល​ប្រយោជន៍​ចិនក្នុង​បញ្ហា​​ជម្លោះ​សមុទ្រ​ចិន​ខាង​ត្បូង ស្រប​ពេល​ប្រទេស​អាស៊ាន​មួយ​ចំនួន​ទៀត​បាន​ជ្រើសរើស​យក​សហរដ្ឋ​អាមេរិក​ជា​ខ្នង​បង្អែក​ទប់​ទល់​ជាមួយ​ចិន។ ចំពោះកម្ពុជាកំពុងត្រូវបានអាមេរិក ចោទថានឹងអនុញ្ញតិអោយមានមូលដ្ឋានទ័ពជើងទឹកចិននៅ កម្ពុជា គឺឆ្នេររាម ។តែការចោទនេះ ត្រូវបានកម្ពុជាច្រើនចោលទាំងស្រុង។

ការ​ធ្វើ​សមយុទ្ធ​យោធា​រវាង​អាស៊ាន និង​សហរដ្ឋ​អាមេរិក​នេះ គឺ​នៅ​ស្រប​ពេល​ដែល​បញ្ហា​ជម្លោះ​សមុទ្រ​ចិន​ខាង​ត្បូង​កំពុង​តែ​តាន​តឹង​ខ្លាំង ដោយសារ​ចិន​បាន​បង្កើន​សកម្មភាព​ឥត​ឈប់​ឈរ​លើ​តំបន់​ជម្លោះ ។

វៀតណាម និងហ្វីលីពីន កំពុងប្រទាញប្រទង់គ្នា ដណ្ដើមកាន់កាប់ដែនកោះមួយចំនួននៅសមុទ្រចិនខាងត្បូង ប៉ុន្តែចិន ត្រូវបានរាយការណ៍មកថា បានដណ្ដើមកាន់កាប់តំបន់នោះសឹងទាំងស្រុងទៅហើយ បន្ទាប់ពីពាន ស្ថាបនាកោះសិប្បនិម្មិតចំនួន១០ នៅទីនោះ ដែលជាមូលដ្ឋានទ័ពជើងទឹករបស់ខ្លួន។

ការធ្វើសមយុទ្ធ ទ័ពជើងទឹក រវាងអាស៊ាននិង អាមេរិក នៅលើឈូងសមុទ្រថៃ គឺជាលើកដំបូង  បន្ទាប់ពីអាមេរិក សង្ស័យថាឆ្នេររាមកម្ពុជាទៅថ្ងៃខាងមុខអាចក្លាយជាមូលដ្ឋានទ័ពជើងទឹកចិន។ តែកម្ពុជា បដិសេធដាច់ខាតថាពុំមានដូចការសង្ស័យរបស់អាមេរិកនោះទេ៕

The post កម្ពុជាមិនទាន់ឆ្លើយថាត្រូវចូលរួម សមយុទ្ធយោធារវាងអាមេរិកនិងសមាគមអាស៊ាននៅឡើយ appeared first on WMC.

ខេត្តព្រះសីហនុ៖ កាលពីថ្ងៃទី២៧ សីហា ម្សិលមិញអភិបាលខេត្តព្រះសីហនុ និងក្រុមហ៊ុនឯកជនមួយបានពិភាក្សា និងសិក្សារកវិធីសាស្រ្តដោះស្រាយបញ្ហាជំនន់ទឹកភ្លៀង​តាមរយៈការបង្ហោះត្រូនប្រមូលទិន្នន័យប្រព័ន្ធអូរ ប្រឡាយ ក្នុងក្រុងព្រះសីហនុ។ នេះបើយោងតាមទំព័រហ្វេសប៊ុករបស់សាលាខេត្តព្រះសីហនុ។

លោក សោម មិថុនារត្ន័ ប្រធានក្រុមហ៊ុន KCC Cambodia Co Ltd និយាយថា ដោយ សារតែស្ថានភាពជំនន់ទឹកភ្លៀងនាពេលកន្លងមក បានបង្កឱ្យមានការជន់លិចផ្ទះប្រជាពលរដ្ឋ ក្រុមហ៊ុននឹងផ្តោតជាសំខាន់ បញ្ហាទឹកភ្លៀង សណ្ឋានដី កំពស់ទឹកសមុទ្រ ដែលមានវិសាលភាពប្រឈមនឹងជំនន់ទឹកភ្លៀង។ លោកគូសបញ្ជាក់ថា ក្រុមហ៊ុនត្រូវការបង្ហោះត្រូនដើម្បីប្រមូលព័ត៌មាន និងទិន្នន័យសុក្រឹតពីសណ្ឋានដីឱ្យបានច្បាស់លាស់។ មួយទៀតត្រូវប្រមូលព័ត៌មានពីប្រព័ន្ធអូរ ប្រឡាយទឹកភ្លៀង ទឹកកខ្វក់ និងទឹកស្អាត ដោយសិក្សាផ្អែកលើវិទ្យាសាស្ត្រ និងមជ្ឈមណ្ឌលវិភាគផងដែរ។

ក្នុងប្រតិបត្តិការសិក្សារំដោះបញ្ហាជំនន់ទឹកភ្លៀង ក្រុមហ៊ុននឹងបង្ហោះដ្រូនប្រើពេលប្រហែល ១២សប្តាហ៍ ដើម្បីប្រមូលទិន្នន័យជាក់លាក់លើផ្ទៃដី ៥.០៨០ហិកតា ក្នុងក្រុងព្រះសីហនុ ។

លោក គួច ចំរើន អភិបាលខេត្តព្រះសីហនុ ស្វាគមន៍ចំពោះក្រុមហ៊ុន KCC Cambodia Co Ltd ដែលមក សិក្សាលើប្រព័ន្ធអូរ ប្រឡាយ ដាក់លូរំដោះទឹកភ្លៀង និងទឹកកខ្វក់ ដើម្បីកែលម្អសោភ័ណភាព បរិស្ថានកាន់តែល្អប្រសើរឡើងបន្ថែមទៀត។ លោកទទួលស្គាល់ថា បច្ចុប្បន្នខេត្តព្រះសីហនុប្រឈមបញ្ហាជំនន់ទឹកភ្លៀង ដែលត្រូវការភាគីពាក់ព័ន្ធចូលរួមដោះស្រាយ។

សូមបញ្ជាក់ថា កាលពីពេលថ្មីៗនេះខេត្តព្រះសីហនុបានជួបប្រទះការលិចលង់ដោយជំនន់ទឹកភ្លៀងបង្កឡើងពីឥទ្ធិពលព្យុះ និងភ្លៀង បណ្តាលឱ្យមានមនុស្សស្លាប់ ៣នាក់ ហើយផ្ទះប្រជាពលរដ្ឋរាប់រយខ្នងត្រូវលិចលង់។

ជាដំណោះស្រាយសម្រាប់ខេត្តព្រះសីហនុ រដ្ឋមន្រ្តីក្រសួងសាធារណការ និងដឹកជញ្ជូន បានប្រកាសថា នឹងគ្រោងថវិកាប្រមាណ ១៧០លានដុល្លារ ដើម្បីរៀបចំកែសម្រួលប្រព័ន្ធចម្រោះទឹកកខ្វក់ និងដោះស្រាយបញ្ហាជំនន់ទឹកភ្លៀង។​

ថវិកានេះនឹងចំណាយលើការរៀបចំស្តារប្រព័ន្ធចម្រោះដែលមានសមត្ថភាពសម្អាតទឹកកខ្វក់បាន ៤ម៉ឺនម៉ែត្រគីបក្នុងមួយថ្ងៃ ការៀបចំបណ្តាញលូមេបង្ហូរទឹកកខ្វក់ប្រវែង ៤៥គីឡូម៉ែត្រ ការរៀបចំបណ្តាញលូខ្នែងតភ្ជាប់ពីផ្ទះពលរដ្ឋ ឬសណ្ឋាគារប្រវែង ៤៧ គីឡូម៉ែត្រ ការសាងសង់ស្ថានីយ៍បូមទឹកកខ្វក់បញ្ចូលអាងចម្រោះ និងសាងសង់ប្រព័ន្ធលូបង្ហូរទឹកភ្លៀងប្រវែង ២០គីឡូម៉ែត្រ៕

The post អាជ្ញាធរខេត្តព្រះសីហនុនិងក្រុមហ៊ុនមួយចង់បង្ហោះត្រូនសិក្សារកគន្លឹះរំដោះជំនន់ទឹកភ្លៀង appeared first on WMC.

នៅថ្ងៃពុធទី ២៨សីហានេះ  គឺជាការបើកការកាត់ក្ដី លើសំនុំរឿង ពុករលុយរាប់រយលានដុល្លារ ប្រឆាំង ណា​ជីបរ៉ាហ្សាក់ ដែលបានប្រព្រឹត្តអំឡុង កាន់អំណាច ជានាយករដ្ឋមន្ត្រីនៃប្រទេសម៉ាឡេស៊ី។ ថ្ងៃនេះ គេហៅថាការជំនុំជម្រះក្ដីជាលើកដំបូង ដែលមានបូកសរុបបទចោទ ប្រឆាំងអតីតបុរសខ្លាំងម្នាក់នេះ មានដល់ទៅ៤២ ករណី។

លោកណា​ជីបរ៉ាហ្សាក់ គឺជានាយករដ្ឋមន្ត្រី ធ្លាក់ពីអំណាច នៅក្នុងការបោះឆ្នោតនៃប្រទេសម៉ាឡេស៊ី​កាលពីខែឧសភា ឆ្នាំ២០១៨។ បុរសនេះ បានកាន់អំណាចរយៈពេល២អាណត្តិ១០ឆ្នាំ។ គាត់ជា មេដឹក នាំរណសិរ្យ ជាតិបារិសាន់ ឬ UMNO ដែលធ្លាប់កាន់អំណាចជាង៦០ឆ្នាំ។ 

បុរសនេះ ត្រូវគេពណ៌នាថា ជាមេដឹកនាំម៉ាឡេស៊ី ដែលមិនទទួលស្គាល់ ខ្លួនខ្សោយម្ដងណាឡើយ ហើយ ក៏ ជា​អ្នកនយោបាយ ងាយបង្រ្កាប គូប្រជែងជាខ្លាំង អោយតែ ក្រុមប្រឆាំង រិះគន់ លើរូបគាត់​ចំពោះ​ការដឹកនាំរដ្ឋាភិបាល ។ ក្រុមប្រឆាំង និងអង្គការសង្គមស៊ីវិល រាប់សិបនាក់ ត្រូវបានចាប់ខ្លួន ដោយសារពួគគេ រិះគន់ គាត់ ថាបានប្រព្រឹត្តអំពើពុករលួយ រាប់រយលានដុល្លារ ហើយបាន ទាមទារ បុរសនេះ ឡើងបំភ្លឺនៅ សភា និងតុលាការ ។ មិនត្រឹមតែ ក្រុមប្រឆាំង ត្រូវបានលោក ប្ដឹងបក​ពី​បទ​បរិហារ​កេរ្តិ​របស់លោក ដែលនាំអោយមានការឃាត់ខ្លួន គឺសូម្បី ពួករដ្ឋអាជ្ញា និង រដ្ឋមន្ត្រីរបស់លោក ជាច្រើននាក់ ក៏លោកបាន ដកហូតតំណែងផងដែរ។​ ជាមួយគ្នា អ្នកមានគុណលើរូបលោក គឺលោក​មហាធាមហាម៉ាត ដែល​តែងតាំងលោក ជាប្រធានគណប​ក្ស និងជាបេក្ខជននាយករដ្ឋមន្ត្រី ក៏លោក គំរាមប្ដឹងអោយតុលាការផ្តន្ទាទោស ផងដែរ។ តែយ៉ាងណា ទីបំផុត បុរសនេះ ដែលមានបំណង​កាន់​អំណាច ទៅរកការគ្រប់គ្រងបែប អត្តាធិបតេយ្យ កំពុងមានទុក្ខក្នុងខ្លួន គឺក្រោយពីអស់អំណាច ដោយ​សារ ពលរដ្ឋ បោះឆ្នោតទម្លាក់គាត់​នៅក្នុងការបោះឆ្នោត ។  ដូចគេថា ពេលមានអំណាច គឺមិនដែល មានកំហុសនិងមិនដែលចុះចាញ់នឹងព្រហ្មលិខិតម្ដងណាឡើយ។ ដល់ពេលនេះ កំហុសរបស់បុរសខ្លាំង នេះ សឹករាប់មិនអស់។

៤២ករណី ប្រឆាំងនឹងលោកណាជីប

តាមបណ្ដាញផ្សាយព័ត៌មាន Aljazeera  លោកណាជីប ត្រូវបាននាំខ្លួន មកកាន់តុលាការតាំងពីព្រឹកថ្ងៃ ពុធទី២៨សីហានេះ ។ការនាំខ្លួន អតីតនាយករដ្ឋមន្ត្រីរូបនេះ គឺអោយមកប្រឈមមុខដោយផ្ទា​ល់ដែល​គេហៅថា ការជំនុំជម្រះក្ដីជាលើកដំបូង ក្នុសំនុំរឿង លួចលុយជាតិ រាប់រយលានដុល្លារ យករក្សាទុកក្នុង គណនីឯកជនរបស់ខ្លួន ដែលគាត់បានលួចផ្ទេរ ពីធនាគារ រដ្ឋ One MDB  មាន៥៥០លានដុល្លារ។

តាមប្រភព ដដែលនេះ គឺលោកណាជីប ប្រឈមមុខនឹងបទចោទ ដល់ទៅ៤២ ករណី ដែលក្នុងនោះ មាន បទចោទ អំពើពូករលួយ កឹបកេងទ្រព្យសម្បតិ្តជាតិ ការបំពានអំណាចរដ្ឋ និងបទចោទ ករណីព្រហ្មទ័ពជាច្រើនទៀត ពាក់នឹងគ្រួសាររបស់លោក អតីតសមាជិកគណៈរដ្ឋមន្ត្រីរបស់លោក។

នៅពេលត្រូវបានខ្លួនឡើងតុលាការ ដោយដើរចេញពីរថយន្ត របស់សមត្ថកិច្ច លោកណាជីប ខំប្រឹង ទប់​ជំហរខ្លួន ដោយការញញឹមដាក់មហាជន ហើយប្រកាសថារូបលោក មិនបានប្រព្រឹត្តដូចការចោទនេះ ទេ។ លោកថា លោកកំពុងរងសម្ពាធ ខាងផ្លូវនយោបាយ ដែលលោកថា គឺការសងសឹង របស់អ្នកនយោបាយកាន់អំណាច ដឹកនាំដោយនាយករដ្ឋមន្ត្រីមហាធា។ លោកបញ្ជាក់ថា រូបលោកក៏ជាអ្នកជួយ កសាងប្រទេសដែរ ថាតើរឿងអីលោកមានមហិច្ឆតា បំពានច្បាប់ និងធ្វើអោយមានកំហុសទៅវិញ។ តែយ៉ាងណា នេះក្ដី ក្រុមស៊ើបអង្កេតករណីពុករលួយ បានរកឃើញលុយលួចជាតិរបស់លោកណាជីបនិងគ្រូសាររបស់លោកដល់ទៅ៥៥០លានដុល្លារអាមេរិក។  ​មិនថាឡើយ តែលោកណាជិប គឺអតីតរដ្ឋមន្ត្រីរបស់លោក ជាច្រើននាក់ មានទាំងភរិយា និងកូនរបស់លោកផងដែរ កំពុងដាក់អោយស្ថិតក្នុងការរង់ចាំ ដើម្បីកោះហៅមកជំនុំជម្រះក្ដី គឺដូចរូបលោកដែរ ។ នេះជាលើកដំបូងហើយ ដែលប្រទេសម៉ាឡេស៊ី បើករឿងក្ដីពុករលួយថ្នាក់ជាតិ ប្រឆាំងនឹងអតីតមេដឹកនាំរបស់ខ្លួន ដែលអស់អំណាច​ ដោយការទាញទម្លាក់ពីសំណាក់ម្ចាស់ឆ្នោត៕

The post ម៉ាឡេស៊ី៖បើណាជីបមិនអស់អំណាចគឺមិនអាចនាំខ្លួនមកកាត់ក្ដីបានឡើយ-ករណីពុករលួយ appeared first on WMC.

ភ្នំពេញ៖ មកដល់ពេលនេះ ឧត្តមក្រុមប្រឹក្សាពិគ្រោះ និងផ្ដល់យោបល់ បានដំណើរការអស់រយៈពេលជាងមួយឆ្នាំហើយ ។ ប្រធាន និងអនុប្រធានមកពីបណ្ដាគណបក្សតូចៗមួយចំនួន ដែលជាសមាជិកនៃឧត្តមក្រុមប្រឹក្សានេះ បានអះអាងពីសកម្មភាពរបស់ខ្លួនដែលបានធ្វើកន្លងមក ដូចជាចុះមូលដ្ឋានជួយនាំពាក្យ និងទុក្ខលំបាករបស់ពលរដ្ឋដល់រាជរដ្ឋាភិបាល និងបំផុសឡើងឱ្យឃើញពីអស​មត្ថភាពរបស់មន្ត្រីកម្ពុជាមួយចំនួន ។ រដ្ឋលេខាធិការក្រសួងព័ត៌មានថា ឧត្តមក្រុមប្រឹក្សានេះ បានបំពេញការងារក្នុងការរួមចំណែកជាមួយរាជរដ្ឋាភិបាល ហើយមានប្រសិទ្ធភាពការងារលើសពីបក្សដែលមានសំលេងភាគតិចនៅក្នុងរដ្ឋសភានាពេលកន្លងមក ។ ដោយឡែក អ្នកវិភាគថា ឧត្តមក្រុមប្រឹក្សាពិគ្រោះ និងផ្ដល់យោបល់ គឺមិនអាចប្រៀបប្រដូចទៅនឹងប្រទេសមានរដ្ឋសភាពហុបក្សនោះទេ ជាក់ស្ដែង គឺលទ្ធផលកន្លងមករបស់ក្រុមប្រឹក្សានេះ លោកថានៅមានកម្រិតទាបខ្លាំង ។

ដើម្បីឱ្យជ្រាបកាន់តែច្បាស់អំពីរឿងនេះ សូមស្ដាប់បទសម្ភាសន៍រវាងលោក សោម លាភ ជាមួយនឹងលោកបណ្ឌិតមាស នី ដូចតទៅ៖

The post អ្នកវិភាគ៖ ជាងមួយឆ្នាំ លទ្ធផលការងារនៃឧត្តមក្រុមប្រឹក្សាពិគ្រោះ និងផ្ដល់យោបល់តិចតួចបំផុត appeared first on WMC.

សេចក្ដីរាយការណ៍ជាច្រើនពីទីក្រុងហុងកុងបានឱ្យដឹងថា នៅព្រឹកព្រលឹមថ្ងៃព្រហស្បត្ត ិ៍នេះទីក្រុងប៉េកាំងបានបញ្ចូនកងទ័ពរបស់ខ្លួនមួយកងពលដែលបំពាក់ដោយរថពាសដែកនិងគ្រឿងសព្វាវុធមួយចំនួនទៀត បើកចូលទៅកាន់ទីក្រុងហុងកុងដែលមើល ឃើញថាគឺជាការគម្រាមដោយផ្ទាល់ចំពោះបាតុកម្មរបស់ប្រជាជនហុងកុងដែលបានធ្វើឡើងរយៈពេលពីរខែមកនេះ។បណ្ដាញផ្សាយព័ត៌មានរបស់ទីក្រុងហុងកុងដែលស្រង់មកចុះផ្សាយដោយទីភ្នាក់ងារសារព័ត៌មានរ៉យទ័រចុះផ្សាយថា ការបញ្ចូនទ័ពនៃកងរំដោះប្រជាជនចិនគឺត្រូវបានមើលឃើញថា ជារូបភាពនៃការចាប់ផ្ដើមបង្រ្កាបបាតុករប៉ុន្ដែកងទ័ពទាំងនេះ គឺមកដោះដូរការចេញទៅវិញរបស់កងទ័ពចិនដែលមកកាន់ទីក្រុងហុងកុងតាំងពីឆ្នាំ១៩៩៧។ យោងតាមលក្ខន្ដិកៈនៃទីក្រុងហុងកុងនៅឆ្នាំ១៩៩៧នៅពេលដែលផ្ទេរការគ្រប់គ្រងទៅឱ្យទីក្រុងប៉េកាំងនោះគឺកងទ័ពនេះមានវត្តមាននៅហុងកុងដើម្បីពង្រឹងសន្ដិសុខតំបន់ប៉ុន្ដែកងទ័ពទាំងនោះមិនត្រូវបានផ្ដល់ឱកាសដើម្បីប្រើប្រាស់អាវុធបង្រ្កាបទៅលើបញ្ហាណាមួយនៃទីក្រុងហុងកុងនោះទេ។លក្ខន្ដិកៈនេះតម្រូវឱ្យទីក្រុងប៉េកាំងដោះដូរកងទ័ពរបស់ខ្លួនជំនួសកងទ័ពដែលមានលើទឹកដីហុងកុងតាំងពីឆ្នាំ១៩៩៧។យ៉ាងណាក៏ដោយអ្នកការទូតលោកខាងលិចនិងតំបន់អាស៊ីដែលមានវត្តមាននៅក្រុងហុងកុងកំពុងតែឃ្លាំមើលយ៉ាងប្រុងប្រយ័ត្នចំពោះការបញ្ចូនកងទ័ពប្រជាមានិតចិនចូលទៅទីក្រុងហុងកុងចំពេលដែលប្រជាជនរបស់ទីក្រុងនេះបន្ដធ្វើបាតុកម្មប្រឆាំងទីក្រុងប៉េកាំងរយៈពេលពីរខែមកនេះ។តាមសេចក្ដីរាយការណ៍មួយផ្សេងទៀតបានឱ្យដឹងថា ទីក្រុងប៉េកាំងក្រោយពីបញ្ចូនទ័ពរបស់ខ្លួនមួយកងពលនេះទៅដល់ទីក្រុងហុងកុងហើយនោះគឺទីក្រុងនេះនឹងត្រូវដាក់ឱ្យស្ថិតនៅក្នុងច្បាប់គ្រាមានអាសន្នឬច្បាប់អាជ្ញាសឹក។គេហទំព័ឬEjinsight.com បានចុះផ្សាយថា លោកស្រីខារីឡាំ ទទួលការបញ្ចូនពីទីក្រុងប៉េកាំងឱ្យលោកស្រីដាក់ចេញនូវច្បាប់គ្រាមានអាសន្ននៅរយៈពេលប៉ុន្មានថ្ងៃទៀតនេះនូវអ្វីដែលគេហៅថាដើម្បីរៀបចំសណ្ដាប់ធ្នាប់ក្រុងហុងកុងឡើងវិញ។ប៉ុន្ដែគេហទំព័រនេះបានបញ្ជាក់ថា លោកស្រីខារីឡាំបានសារភាពថា លោកស្រីគញមានអំណាចក្នុងការធ្វើសេចក្ដីសម្រេចណាួយតាមការទាមទាររបស់បាតុករដែលដាក់កំហិតឱ្យលោកស្រីលាលែងពីតំណែនោះទេ។ យ៉ាងណាក៏ដោយប្រសិនបើបម្រាមនេះចូលជាធរមានហើយចំពេលដែលក្រុងប៉េកាំងបានបញ្ចូនទ័ពចូលទីក្រុងហុងកុងទៀតនោះត្រូវបានមើលឃើញថា គឺជាសញ្ញានៃការចាប់ផ្ដើមរឹតបន្ដឹងសន្ដិសុខទីក្រុងហុងកុងឡើងវិញជាមួយនឹងការចាត់វិធានការណ៍បង្រ្កាបលើបាតុករ។នៅក្នុងកិច្ចប្រជុំG7ដែលធ្វើឡើងនៅប្រទេសបារាំងកាលពីសប្ដាហ៍នេះគឺប្រទេសជឿនលឿនទាំងប្រាំពីរនេះបានអំពាវនាវទៅកាន់ប្រធានាធិបតី ស៊ីជីងភីងកុំឱ្យមានវិធានការបង្រ្កាបណាមួយឱ្យសោះទៅលើបាតុករ។ក្រុមប្រទេស G7បានទាមទារឱ្យចិនបន្ដគោរពកិច្ចព្រមព្រៀងអតីតអាណានិគមអង់គ្លេសនិងក្រុងប៉េកាំងឡើងវិញដែលពួកគេថាក្រុងប៉េកាំងមិនទាន់មានសិទ្ធិគ្រប់គ្រាន់ដើម្បីកាន់កាប់ទីក្រុងហុងកុងទាំងមូលនោះទេទាល់ឆ្នាំ២០៤៧។តែយ៉ាងណាក៏ដោយកាសែតអាមេរិក New York Times ចុះផ្សាយថា ការបញ្ចូនកងទ័ពចូលទៅទីក្រុងហុងកុងនៅពេលនេះគឺជាការគម្រាមកំហែងដោយផ្ទាល់ហើយថាប្រសិនបើមានការបង្រ្កាបណាមួយនោះគឺជាការបង្ហូរឈាមជនស៊ីវិល។សូមជម្រាបថាមកដល់ពេលនេះបាតុករប្រមាណ១ពាន់នាក់ត្រូវបានចាប់ខ្លួនក្រុមប៉េកាំងធ្លាបអនុវត្តការបង្រ្កាបទៅលើប្រជាជនខ្លួនឯងដែលធ្វើបាតុកម្មនៅទៀនអានមីន ឆ្នាំ៩៨៩នោះគឺបណ្ដាលឱ្យបាតុករជាង១ម៉ឺននាក់បានស្លាប់ហើយអ្នកដែលជោគជ័យគឺបក្សកុម្មុយនីស្ដចិន៕

The post ចិនបញ្ចូនទ័ពនិងរថពាសដែកចូលទីក្រុងហុងកុងហើយ appeared first on WMC.

ខ្លឹមសារបញ្ចេញមតិលើអត្ថបទរបស់កាសែតភ្នំពេញប៉ុស្ដិ៍ចុះអំពីទំនុកចម្រៀងថ្មីរបស់សម្ដេចហ៊ុនសែនផ្ញើជូនលោកសមរង្ស៊ី ។ភ្នំពេញប៉ុស្ដិ៍ចុះមួយលើកទៀតនេះ និយាយពីការភ្នាល់ដាក់ប្រាក់ទៅវិញចំពោះ ការវិលត្រឡប់​មក​វិញរបស់លោកនៅថ្ងៃទី៩វិច្ឆកា ។តែលោកសមរង្ស៊ីមិនពេញចិត្ត។ យ៉ាងណាលោកសមរង្ស៊ី ស្នើប្ដូរទៅជាការដាក់តំណែងសម្ដេចនាយករដ្ឋមន្រ្ដី ទៅវិញ។ អ្នកវិភាគថាការភ្នាល់បែបណាក៏ដោយគ្មានតម្លៃចំពោះ​ដំណោះ​ស្រាយជាតិនោះទេ។  

កញ្ញា ឆោមពៅនិការាយការណ៍

បានមកដល់ប្រទេសសិង្ហបុរីក្នុងដែនដីអាស៊ីអាគ្នេយ៍ កៀកនឹងកម្ពុជា គឺលោកសមរង្ស៊ីកំពុងជំនះចិត្តអ្នកមិនជឿថាលោកមកកម្ពុជាវិញ គឺក្នុងថ្ងៃ០៩វិច្ឆិកាឆ្នាំ២០១៩ នៃទិវាឯករាជ្យជាតិ។ ការវិលមកវិរបស់មេដឹកនាំបក្សប្រឆាំង​រូប​​នេះ បានកកើតឱ្យមានជាវេទិកាដេញដោល ហើយជាងនេះ គឺជាប្រធានបទភ្នាល់ដាក់លុយ។

ដោយច្រានចោលការភ្នាល់ដាក់លុយ  លោកសមរង្ស៊ីសរសេរពីរឿងនេះ ក្នុងន័យដើមទាំងស្រុងនៃទំព័រហ្វេសប៊ុករបស់លោកថា៖បើយើងគោរពប្រទេសជាតិរបស់យើងមែន យើងមិនត្រូវភ្នាល់គ្នាដោយដាក់លុយទេ ទាក់ទងអនាគតប្រទេសជាតិរបស់យើង។ យើងជាអ្នកនយោបាយ មិនមែនជាអ្នកលេងល្បែងស៊ីសងទេ។ តែខ្ញុំអាចទទួលយកនូវការភ្នាល់គ្នាបែបនេះ ៖ បើលោក ហ៊ុន សែន មិនជឿថាខ្ញុំនឹងវិលត្រឡប់មកប្រទេសកម្ពុជាវិញមែន នៅ ថ្ងៃ ០៩ វិច្ឆិកា ២០១៩ នេះទេ តើលោក ហ៊ុន សែន យល់ព្រមចុះចេញពីតំណែងភ្លាមមួយរំពេចទេ នៅពេល ខ្ញុំមកជាន់ទឹកដីប្រទេសកម្ពុជាយ៉ាងជាក់ស្តែង នៅថ្ងៃ ០៩ វិច្ឆិកា ២០១៩ ខាងមុខនេះ?  យើងអាចស្នើឲ្យប្រទេសចិនធ្វើជាសាក្សី ក្នុងការភ្នាល់គ្នានេះ»។

គណនីសកម្មជនហ្វេសប៊ុកមួយ ឈ្មោះថា ខាន់សុវណ្ណ អង្គព្រោកប្រាង្គ បានប្រកាសយ៉ាងក្លៀវក្លាក្នុងការភ្នាល់លើរឿងនេះ។ កាលពីថ្ងៃ១៨សីហា គេហទំព័រសារព័ត៌មានFresh news បានសរសេរថា  ក្រុមសមាជិកអង្គព្រោកប្រាជ្ញ ដែលមានលោក ខាន់ សុវណ្ណ ជាតំណាងប្រកាសជាផ្លូវការសុំបបួលលោក សម រង្ស៉ី ភ្នាល់នូវទឹកប្រាក់១លានដុល្លារ សហរដ្ឋអាមេរិក បើលោក សម រង្ស៉ី ហ៊ានវិលចូលស្រុកវិញនៅថ្ងៃទី០៩ ខែវិច្ឆិកា ឆ្នាំ២០១៩ ហើយទឹកប្រាក់១លានដុល្លារនឹងប្រគល់ជូនដោយផ្ទាល់ដៃលោក សម រង្ស៊ី នៅក្នុងពន្ធនាគារតែម្តង តែពេលនោះលោកថាពួកគេបានសម្ដែងអារម្មណ៍យល់ថា លោក សម រង្ស៉ី កុហកប្រជាជនខ្មែរមិនហ៊ានចូលស្រុកទេ។

រហូតមកដល់ថ្ងៃទី២៥ សីហា ដោយទន្ទឹងមិនឃើញការឆ្លើយតបរបស់អ្នកនយោបាយនៃអតីតគណបក្សសង្គ្រោះជាតិ លោកខាន់សុវណ្ណបានប្រកាសប្តូរពីការភ្នាល់មួយលានដុល្លាសងវិញត្រឹម50ម៉ឺននោះមកជា ហើយថាជូនលោកសមរង្ស៊ីមួយលានដុល្លា។

ជាងនេះទៅទៀត ការភ្នាល់នេះបានជះឥទ្ធិពលដឹងលឺដល់ សម្ដេចនាយករដ្ឋមន្រ្ដីហ៊ុនសែន គឺនៅថ្ងៃទី២៥សីហាដដែល លោកខាន់សុវណ្ណបានកាត់តវីឌីអូមួយភ្ជាប់នឹងការហៅទូរស័ព្ទចូលពីសម្ដេចផ្ទាល់ចូលមករូបលោកពេលកំពុងឡាយវីឌីអូ គឺសម្ដេចព្រមចូលរួមធ្វើជាសាក្សីលើការភ្នាល់ទម្រង់ ចាក់មួយសងកន្លះ ព្រោះថាថវិការបស់លោកសមរង្ស៊ីកំពុងដុនដាប ហើយប្រឈមនឹងការចូលពន្ធនាគារទៀតផង។

សម្លេង–០១សម្ដេច
ក្រោយពេលដែលលោកសមរង្ស៊ីផ្ដល់សម្ភាសន៍ដល់វិទ្យុខ្មែរអន្ដរជាតិជាច្រើនមានមូលដ្ឋាននៅសហរដ្ឋអាមេរិកហើយ ក្រុមអ្នកភ្នាល់ដែលដំបូងឡើយមិនជឿថាលោកមក គឺស្រូតប្រែការគិតថាបើលោកមក គឺចាំជូនដំណើរ លោកនឹងលុយចូលទៅ កាន់ពន្ធនាគារ និង ធនាគារ។ យ៉ាងណាលោកសមរង្ស៊ីបានច្រានចោលការភ្នាល់ ជាលុយថាអ្នកនយោបាយមិនមែនអ្នកល្បែងស៊ីសងលុយកាក់ បែបនោះល្បែង នយោបាយមែនទែនគឺតំណែងនាយករដ្ឋមន្រ្ដីដោយបូកឱ្យចិនធ្វើជាសាក្សីលើរឿងនេះ។

ពីលើការភ្នាល់គ្នាបែបនេះ អ្នកវិភាគបញ្ហាសង្គមជើងចាស់ លោកបណ្ឌិតមាសនី ហាក់មិនចង់អធិប្បាយដែលលោក ថាការភ្នាល់នេះដដែលៗ ហើយគ្មានតម្លៃសម្រាប់ជាតិទេ និង មិនគួរមានអ្វីពាក់ព័ន្ធនឹងចិនឡើយ។

សម្លេង០០២-

សម្ដេចហ៊ុនសែនជាប់ជានាយករដ្ឋមន្រ្ដីកម្ពុជា៥អាណត្តិមកហើយ គឺមានរយៈពេល ជាង៣០ឆ្នាំ ប៉ុន្ដែល្បែងភ្នាល់នេះដែលអ្នកវិភាគមិនឱ្យតម្លៃ គឺទំនងជាទឹកចុងក្រោយ រវាងសម្ដេចហ៊ុនសែននិងលោកសមរង្ស៊ីអ្នកនយោបាយល្បីល្បាញជាងគេនៅកម្ពុជាដែលប្រកាសវិលចូលកម្ពុជាវិញថ្ងៃ៩វិច្ឆិកាគឺមានតម្លៃជាងអាយុជីវិតលោកទៅទៀត៕

The post លោកសមរង្ស៊ីស្នើភ្នាល់ដាក់តំណែងសម្ដេចហ៊ុនសែនយកចិនជាសាក្សីករណីមាតុភូមិនិវត្តន៍របស់លោក appeared first on WMC.

ប្រភពពីក្រសួងការពារជាតិថៃបាន អោយដឹងថា នៅចុងឆ្នាំ២០១៩និង ឆ្នាំ២០២០ គឺ ប្រទេសថៃនឹង​ទិញ រថពាសដែក ផលិតដោយប្រទេសអាមេរិក ចំនួន១២០គ្រឿងដែលគេមើលឃើញ​ថា ការណ៍នេះ ដោយសារ សហ​រដ្ឋអាមេរិកបានទទួលស្គាល់រាជរដ្ឋាភិបាល ថៃថ្មីក្រោយការបោះឆ្នោតសភាថ្មីកាលពី​ខែមីនា​ឆ្នាំ​២០១៩។

សហរដ្ឋអាមេរិក បានកាត់ផ្ដាច់ជំនួយ ទៅប្រទេសថៃ បន្ទាប់ពី ពួកយោធា ធ្វើរដ្ឋប្រហារ ដណ្ដើម អំណាចពីគណបក្សនយោបាយ។ តែក្រុងវ៉ាស៊ីនតោន បានសម្រេចស្ដារទំនាក់ទំនងជាមួយ រាជរដ្ឋាភិ​បាល ថ្មីក្រោយពី ប្រទេសថៃបញ្ចប់ការគ្រប់គ្រងដោយពួកយោធា។

នាយឧត្តមសេនីយ៍ Apirat Kongsompong ដែលស្រង់មកចុះផ្សាយដោយទីភ្នាក់ងារសារព័ត៌មាន Reuters បាននិយាយថា ថៃនឹងទទួលបាន រថពាសដែក ពីអាមេរិកចំនួន៧០គ្រឿងនៅចុងឆ្នាំ២០១៩ ហើយ ៥០គ្រឿងទៀតនឹងទទួលបាន នៅក្នុងឆ្នាំ២០២០។

តែយ៉ាងណា លោក Apirat មិនបានអះអាងថា ថៃបានចំណាយប្រាក់ប៉ុន្មានលានដុល្លារនោះទេ  ប៉ុន្តែ បើតាមប្រភពរបស់ក្រសួងការពារជាតិ ថៃ គឺក្នុង១២០គ្រឿងនេះ សហរដ្ឋអាមេរិក នឹងផ្ដល់ជំនួយ ២៣​គ្រឿង។ សហរដ្ឋអាមេរិកប្រកាសថា រថពាសដែក ចំនួន៦០ ប្រទេស Stryker គឺមានតម្លៃ១៧៥លាន​ដុល្លារអាមេរិក។

កាលពីប៉ុន្មានឆ្នាំមុននេះ គឺបន្ទាប់ពីរដ្ឋប្រហារ ពួកយោធាថៃ បានបង្វិលមកទិញរថពាសដែកពីប្រទេស​ចិន។តែពេលនេះ ថៃចាប់ផ្ដើមដូចចិត្តវិញ ខណៈអាមេរិក ដកចេញវិញការដាក់ទណ្ឌកម្ម មួយចំនួន លើវិស័យពាណិជ្ជកម្មថៃ ដោយសាររាជាណាចក្រនេះ មានរាជរដ្ឋាភិបាលស៊ីវិល ឡើងវិញហើយបន្ដ​បន្ថែលើនេះទៀតថៃបាន យល់ព្រមធ្វើសមយុទ្ធទ័ពជើងទឹកជាមួយ អាមេរិក នៅថ្ងៃទី២ដល់ទី៦កញ្ញា។

សមយុទ្ធនេះ ថៃជាម្ចាស់ ដោយមានប្រទេស នៃសមាជិកអាស៊ានដទៃទៀតចូលរួមដែរ គឺវៀតណាម ហ្វីលីពីន ម៉ាឡេស៊ី ឥណ្ឌូនេស៊ី និងសិង្ហបុរី ៕ 

The post ថៃនឹងទិញរថពាសដែក ១២០គ្រឿងពីអាមេរិកវបន្ទាប់ពីអាមេរិកទទួលស្គាល់រាជរដ្ឋាភិបាលថ្មី appeared first on WMC.

ប្រភពពីក្រសួងការពារជាតិថៃបាន អោយដឹងថា នៅចុងឆ្នាំ២០១៩និង ឆ្នាំ២០២០ គឺ ប្រទេសថៃនឹង​ទិញ រថពាសដែក ផលិតដោយប្រទេសអាមេរិក ចំនួន១២០គ្រឿងដែលគេមើលឃើញ​ថា ការណ៍នេះ ដោយសារ សហ​រដ្ឋអាមេរិកបានទទួលស្គាល់រាជរដ្ឋាភិបាល ថៃថ្មីក្រោយការបោះឆ្នោតសភាថ្មីកាលពី​ខែមីនា​ឆ្នាំ​២០១៩។

សហរដ្ឋអាមេរិក បានកាត់ផ្ដាច់ជំនួយ ទៅប្រទេសថៃ បន្ទាប់ពី ពួកយោធា ធ្វើរដ្ឋប្រហារ ដណ្ដើម អំណាចពីគណបក្សនយោបាយ។ តែក្រុងវ៉ាស៊ីនតោន បានសម្រេចស្ដារទំនាក់ទំនងជាមួយ រាជរដ្ឋាភិ​បាល ថ្មីក្រោយពី ប្រទេសថៃបញ្ចប់ការគ្រប់គ្រងដោយពួកយោធា។

នាយឧត្តមសេនីយ៍ Apirat Kongsompong ដែលស្រង់មកចុះផ្សាយដោយទីភ្នាក់ងារសារព័ត៌មាន Reuters បាននិយាយថា ថៃនឹងទទួលបាន រថពាសដែក ពីអាមេរិកចំនួន៧០គ្រឿងនៅចុងឆ្នាំ២០១៩ ហើយ ៥០គ្រឿងទៀតនឹងទទួលបាន នៅក្នុងឆ្នាំ២០២០។

តែយ៉ាងណា លោក Apirat មិនបានអះអាងថា ថៃបានចំណាយប្រាក់ប៉ុន្មានលានដុល្លារនោះទេ  ប៉ុន្តែ បើតាមប្រភពរបស់ក្រសួងការពារជាតិ ថៃ គឺក្នុង១២០គ្រឿងនេះ សហរដ្ឋអាមេរិក នឹងផ្ដល់ជំនួយ ២៣​គ្រឿង។ សហរដ្ឋអាមេរិកប្រកាសថា រថពាសដែក ចំនួន៦០ ប្រទេស Stryker គឺមានតម្លៃ១៧៥លាន​ដុល្លារអាមេរិក។

កាលពីប៉ុន្មានឆ្នាំមុននេះ គឺបន្ទាប់ពីរដ្ឋប្រហារ ពួកយោធាថៃ បានបង្វិលមកទិញរថពាសដែកពីប្រទេស​ចិន។តែពេលនេះ ថៃចាប់ផ្ដើមដូចចិត្តវិញ ខណៈអាមេរិក ដកចេញវិញការដាក់ទណ្ឌកម្ម មួយចំនួន លើវិស័យពាណិជ្ជកម្មថៃ ដោយសាររាជាណាចក្រនេះ មានរាជរដ្ឋាភិបាលស៊ីវិល ឡើងវិញហើយបន្ដ​បន្ថែលើនេះទៀតថៃបាន យល់ព្រមធ្វើសមយុទ្ធទ័ពជើងទឹកជាមួយ អាមេរិក នៅថ្ងៃទី២ដល់ទី៦កញ្ញា។

សមយុទ្ធនេះ ថៃជាម្ចាស់ ដោយមានប្រទេស នៃសមាជិកអាស៊ានដទៃទៀតចូលរួមដែរ គឺវៀតណាម ហ្វីលីពីន ម៉ាឡេស៊ី ឥណ្ឌូនេស៊ី និងសិង្ហបុរី ៕ 

The post ថៃនឹងទិញរថពាសដែក១២០គ្រឿងពីអាមេរិកបន្ទាប់ពីអាមេរិកទទួលស្គាល់រាជរដ្ឋាភិបាលថ្មី appeared first on WMC.

កំពង់ធំ៖ របបវាលពិឃាត ប៉ុល ពត បានកាប់សម្លាប់មនុស្សជាច្រើន ហើយបានបន្សល់ទុកនូវក្មេងកំព្រា ស្រ្តីមេម៉ាយ និងប្រជាពលរដ្ឋសូវចេះអក្សរជាច្រើន។ អ្នកស្រី នង សី ជាយុវតីមួយរូបដែលបានរួចផុតជីវិតពីការកាប់សម្លាប់ក្នុងរបបនេះ ហើយអ្នកស្រីចាប់ផ្តើមជីវិតការងារជាក្រុមប្រឹក្សាតាំងពីបែករបបអាវខ្មៅរហូតដល់ពេលបច្ចុប្បន្ន។

សិក្សាបានត្រឹមថ្នាក់ទី ៩ ជំនាន់ដើម អ្នកស្រី នង សី បច្ចុប្បន្នបំរើការងារជាក្រុមប្រឹក្សាឃុំឈូកខ្សាច់ ស្រុកបារាយណ៍ ខេត្តកំពង់ធំ។ រយៈពេល ៤០ ឆ្នាំក្នុងអាជីពការងារជាស្រ្តីក្រុមប្រឹក្សានេះ អ្នកស្រី នង សី បានរំលឹកថា ក្នុងសម័យគ្រាប់ផ្លោងយុវជនពុំបានរៀនងាយស្រួយដូចពេលបច្ចុប្បន្ននេះទេ ប៉ុន្តែសម្រាប់អ្នកស្រី បានតស៊ូខិតខំរៀនសូត្រព្រោះអ្នកស្រីយល់ថា មានតែការសិក្សាទេ ដែលអាចធ្វើឱ្យជីវិតប្រសើរ។

បច្ចុប្បន្នអ្នកស្រី នង សី ទទួលបន្ទុកខាងកិច្ចការនារី និងកុមារក្នុងភូមិចំនួន ១៤ ដែលត្រូវទទួលខុសត្រូវដោះស្រាយរាល់បញ្ហាដែលកើតមានចំពោះកុមារ និងស្រ្តី។

ស្រ្តីក្រុមប្រឹក្សាសក់ខ្លីប្រះស្មារូបនេះបន្តថា ការបញ្ចេញមតិយោបល់ក្នុងការជួយកែតម្រូវរាល់របាយការណ៍ និងកំណត់ហេតុ គឺក្រុមប្រឹក្សាឃុំតែងទទួលយកគំនិតអ្នកស្រីគ្រប់គ្នា។ អ្វីជាក្តីរំពឹងរបស់អ្នកស្រីគឺចង់បំរើប្រជាពលរដ្ឋឱ្យបានល្អ ហើយចង់ឃើញឃុំស្រុកមានការរីកចម្រើនគ្រប់វិស័យ។ មួយវិញទៀតអ្នកស្រី ចង់លើកកម្ពស់ស្រ្តីទូទៅឲ្យមានភាពក្លាហាន និងហ៊ានសម្រេចចិត្តដោយខ្លួនឯង និងចូលរួមរាល់សកម្មភាពភាពដែលមាននៅក្នុងឃុំ។

អ្នកស្រី សុខា ពលរដ្ឋមួយរូបរស់នៅភូមិសិរីរាជ្យ បានឱ្យដឹងថា ពេលអ្នកស្រីជួបការលំបាកអ្នកស្រីតែងរៀបរាប់ពីទុក្ខលំបាកប្រាប់ទៅអ្នកស្រី នង សី ដើម្បីឱ្យជួយដោះស្រាយបញ្ហាក្នុងគ្រួសារខ្លួន ដែលប្ដីតែងតែប្រើអំពើហឹង្សាជារឿយ។ អ្នកស្រី សុខា ប្រាប់ថា នៅពេលមានស្រ្តីជាក្រុមប្រឹក្សាដូច្នេះ ពលរដ្ឋពិសេសស្រ្តី មានភាពងាយស្រួលក្នុងការពិភាក្សា ដោះស្រាយបញ្ហារបស់ស្រ្តីដូចគ្នា។ អ្នកស្រី សុខា ត្រែកអរជាខ្លាំងនៅពេលដែលក្នុងឃុំមានក្រុមប្រឹក្សាឃុំជាស្រ្តី៕

អត្ថបទខ្លីសរសេរដោយ ពោ គឹមសេង យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។

The post អ្នកស្រី នង សី ក្រុមប្រឹក្សាឃុំឈូក ខ្សាច់បំរើការងារតាំងពីបែករបប ប៉ុល ពត appeared first on WMC.

ភ្នំពេញ៖ សម្ដេច ស ខេង ថា ការពលរដ្ឋណាដែល ធ្វើសកម្មភាពទៅទទួលលោក សម រង្ស៊ី ធ្វើមាតុភូមិនិវត្តន៍មកកម្ពុជា គឺជារឿងខុសច្បាប់ ។ ដោយឡែក អ្នកវិភាគថាមិនមែនការជួបជុំទាំងឡាយខុសច្បាប់ទាំងអស់នោះទេ ។
រាយការណ៍ដោយ លោក សោម លាភ

ការបញ្ជាក់បែបនេះរបស់រដ្ឋមន្ត្រីក្រសួងមហាផ្ទៃ ធ្វើឡើងក្នុងចំវេទិកាភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល លើកទី៣ នៅថ្ងៃទី២៩ ខែសីហា ឆ្នាំ២០១៩ នៅទីស្តីការក្រសួងមហាផ្ទៃ ។
សម្ដេច ស ខេង បញ្ជាក់បន្ថែមទៀតថា រាជរដ្ឋាភិបាលកម្ពុជា បន្តប្តេជ្ញាក្នុងការពង្រឹងលទ្ធិប្រជាធិបតេយ្យ នីតិរដ្ឋ និងលំហនយោបាយ ដើម្បីភាពរីកចំរើន ។
សម្តេចថា រាជរដ្ឋាភិបាលនឹងអនុវត្ត​ផ្តោ​តលើចំណុចសំខាន់ៗមួយចំនួនដូចជា៖ ការលើកកម្ពស់​លទ្ធិ​ប្រ​ជា​​ធិបតេយ្យ និងនីតិរដ្ឋបន្ថែមទៀត ជាពិសេសអនុញ្ញាតឱ្យ​បុគ្គលដែលជាប់បម្រាមធ្វើសកម្មភាពនយោបាយ អាចចាប់ផ្តើមធ្វើសកម្មភាពនយោបាយវិញ​បាន ។ ជាងនេះទៅទៀត ក៏មានការលើកកម្ពស់ភាពជាដៃគូពិតប្រាកដ​ជាមួយ​អង្គការ​សង្គម​ស៊ីវិល លើកតម្កើងសិទ្ធិសេរីភាពសារព័ត៌មាន សេរីភាពបញ្ចេញមតិ​ស្រប​តាមរ​ដ្ឋធ​ម្ម​នុ​​ញ្ញ និងច្បាប់នានាជាធរមានជាដើម ។
សម្ដេចថា សុខសន្តិភាព និងស្ថិរភាព គឺជាការចាំបាច់ ដែលរាជរដ្ឋាភិបាលកម្ពុជា ត្រូវតែពង្រឹងដើម្បីឱ្យមានការអភិវឌ្ឍលើវិស័យជាច្រើន ។
រដ្ឋមន្ត្រីក្រសួងមហាផ្ទៃរូបនេះ ថារាជរដ្ឋាភិបាលមានជំហរច្បាស់លាស់ ក្នុងការប្រឆាំងទៅនឹងបុគ្គលដែលមានបំណងធ្វើបដិវត្តន៍ពណ៌ដែលសម្ដេច ថាមិនមែនជាសកម្មភាពប្រជាធិបតេយ្យ ។
សម្ដេចថា ការជ្រើសរើស ឬទម្លាក់មេដឹកនាំ តាមរយៈការបោះឆ្នោត ទើបជារឿងត្រឹមត្រូវតាមច្បាប់ ពោលគឺសកម្មភាពនយោបាយដែលធ្វើឡើងដើម្បីត្រៀមខ្លួនដើម្បីចូលរួមការបោះឆ្នោតលើក្រោយៗទៀត ដូចជាបោះឆ្នោតឆ្នាំ ២០២២ និង ២០២៣ ជាដើម ។
តែរដ្ឋមន្ត្រីរូបនេះផ្តោតសំខាន់ថា បើសកម្មភាពនយោបាយនោះ ធ្វើឡើងក្រោមស្លាកគណបក្សដែលត្រូវបានតុលាការរំលាយ នោះគឺជាសកម្មភាពខុសច្បាប់ ។
លោកថា សកម្មភាពប្រមូលផ្ដុំគ្នា ដើម្បីធ្វើសកម្មភាពផ្ដួលរលំរាជរដ្ឋាភិបាល មិនមែនជាសិទ្ធិស្របតាមច្បាប់នោះទេ ។
លោកបណ្ឌិតមាស នី មានប្រសាសន៍ប្រាប់មណ្ឌលព័ត៌មានស្ត្រីកម្ពុជានៅរសៀលថ្ងៃទី ២៩ សីហានេះដោយយល់ស្របថាបើសកម្មភាពទាំងនោះធ្វើឡើងគ្រាន់តែពិភាក្សា ជួបជុំធម្មតាទេ គឺមិនខុសច្បាប់ទេ តែបើប្រមូលផ្ដុំដោយទាមទារឱ្យមានការបោះឆ្នោតឡើងវិញ ដោយមិនអនុវត្តតាមសាលដីការតុលាការ និងបង្ករជាចលាចលគឺជារឿងខុសច្បាប់ក្នុងបរិបទនៃប្រទេសកម្ពុជា ។
តែលោកថា ក្នុងបរិបទកម្ពុជា មានការពិបាកដោយថា ការចោទប្រកាន់ទាំងឡាយគឺអាស្រ័យទៅលើរាជរដ្ឋាភិបាល ។
យ៉ាងណា មន្ត្រីជាន់ខ្ពស់កម្ពុជាតែងតែប្រកាសព្រមានថា នឹងប្រឆាំង ក៏ដូចជាបង្ក្រាបក្រុមដែលមន្ត្រីទាំងនេះចាត់ទុកថា ជាសកម្មភាពបដិវត្តន៍ពណ៌ ។
លោកបណ្ឌិតមាស នីថា រាជរដ្ឋាភិបាលគួរតែបញ្ឈប់ការព្រមានបែបនេះ ព្រោះអាចធ្វើឱ្យកំហឹងមហាជនផ្ទុះឡើង ។
អ្នកវិភាគរូបនេះបន្ថែមថា​ អាជ្ញាធរមានភាពងាយស្រួលក្នុងការចាង់លោក សម រង្ស៊ី តែការណ៍ដែលបង្ហាញសាច់ដុំ និងកម្លាំងជារឿយៗ គឺដោយសារតែរាជរដ្ឋាភិបាលផ្ទាល់មិនទុកចិត្តថា មាន ឬមិនមានកម្លាំងអ្នកគាំទ្រអតីតគណបក្សសង្គ្រោះជាតិ ជាង ៣លាននាក់ផ្ទុះឡើង ។
គួររំលឹកថា លោក សម រង្ស៊ី បានកំណត់យកថ្ងៃទី ៩ វិច្ឆិកា ឆ្នាំ ២០១៩ គឺជាវេលាដែលលោកធ្វើមាតុភូមិនិវត្តន៍មកកម្ពុជាវិញ ដើម្បីធ្វើឱ្យមានប្រជាធិបតេយ្យឡើងវិញ ។ លោកថា នឹងនាំយកអ្នកមកជាមួយលោក មិនតិចជាងលាននាក់នោះទេ ៕

The post សម្ដេច ស ខេង ថា ការជួបជុំទៅទទួលលោក សម រង្ស៊ី គឺខុសច្បាប់ តែអ្នកវិភាគថាមិនមែនខុសច្បាប់ទាំងអស់ទេ appeared first on WMC.

ក្នុងអត្ថបទមុនយុវជនស្រុកបារាយណ៍ ហុក ដេប៉ូ បានចុះទៅយកព័ត៌មានពីបញ្ហាអនាម័យនៅតំបន់បឹងរាល ដែលជាតំបន់ដាច់ស្រយាលមួយឆ្ងាយពីទីប្រជុំជនប្រហែល ១០ គីឡូម៉ែត គិតពីភូមិសំរោង ឃុំបារាយណ៍ ស្រុកបារាយណ៍ ខេត្តកំពង់ធំ។

ដោយឡែកក្នុងអត្ថបទនេះ យុវជន ហុក ដេប៉ូ នឹងលើកយកបញ្ហាការអប់រំរបស់ក្មេងក្នុងតំបន់បឹងរាលដែលភាគច្រើនជាពលរដ្ឋប្រកបការងារជាអ្នកនេសាទ មកចែកជូននាង កញ្ញា លោក លោកស្រី បានជ្រាបបន្ត។

សាលារៀនមួយខ្នងធ្វើពីឈើប្រក់ដំបូងស័ង្កសី ស្ថិតក្នុងតំបន់បឹងរាល បានចល័តខ្លួនឡើងចុះតាមអំណាចនៃទឹកជន់ និងទឹកស្រក់របស់ធម្មជាតិ។ នៅរដូវទឹកសម្រក់ សាលាមួយនេះបានភ្ជាប់ខ្លួននៅលើគោក ហើយរដូវទឹកលិចសាលានេះបានបណ្តែតខ្លួនលើផ្ទៃទឹក។

សាលារៀនដែលមានទំហំប្រហែល​ ១០ ម៉ែតបួនជ្រុង ចែកជាពីរថ្នាក់នេះ បានឈរជើង រយៈពេល ១០ឆ្នាំហើយក្នុងការផ្តល់ចំណេះដឹងដល់សិស្សក្រីក្រប្រមាណ ២០នាក់ មកពីគ្រួសារអ្នកនេសាទជិត ៥០គ្រួសាររស់នៅទីនោះ។

ពលរដ្ឋរស់នៅក្នុងតំបន់បឹងរាលមួយរូបប្រាប់ថា សាលារៀននេះសាងសង់ឡើងកាលពីជាង ១០ឆ្នាំមុនដោយអ្នកគ្រូគង្វាលសាសនាយេស៊ូគ្រិស្តម្នាក់ឈ្មោះ អីស៊ីធើ។ ដោយមើលឃើញថាក្មេងៗកូនអ្នកនេសាទក្នុងតំបន់ដាច់ស្រយាលមួយនេះ ខ្វះខាតចំណេះដឹងព្រោះគ្មានសាលារៀន អ្នកគ្រូ អីស៊ីធើ ក៏ជួយឧបត្ថម្ភសាងសង់សាលានេះឡើង។

សាលារៀនមួយនេះត្រូវចងភ្ជាប់ក្បូនឫស្សីពីក្រោមដើម្បីឱ្យអណ្តែតទឹកនារដូវទឹកឡើង ហើយត្រូវអូសឡើងគោកនៅរដូវទឹកសម្រក់វិញ ដែលអាចផ្តល់ការបង្រៀនដល់សិស្សបានគ្រប់រដូវ។

រយៈពេល ២ឆ្នាំចុងក្រោយ គ្រូគង្វាលសាសនាយេស៊ូគ្រិស្តបានប្រគល់សាលានេះដល់រដ្ឋមន្រ្តីក្រសួងទេសចរណ៍លោក ថោង ខុន ដើម្បីដាក់ចូលក្នុងក្របខ័ណ្ឌសាលារដ្ឋ។ ការដាក់បញ្ចូលជាសាលារដ្ឋបែបនេះ ដើម្បីមានភាពងាយស្រួលដល់ការបង្រៀនកូនសិស្សជាងមុន ព្រោះខាងសាសនាយេស៊ូគ្រិស្តពិបាករកគ្រូមកបង្រៀននៅទីនេះណាស់ ដោយជាតំបន់ដាច់ស្រយាលពិបាកធ្វើដំណើរ។

តែយ៉ាងណាខាងគ្រូគង្វាលសាសនាយេស៊ូគ្រិស្តតែចុះមកពិនិត្យ និងបង្រៀនព្រះគម្ពីរដល់ប្រជាពលរដ្ឋនៅទីនេះរៀងរាល់ថ្ងៃព្រហស្បតិ៍ដែរ។

សាលានេះមានតែមួយបន្ទប់ប៉ុណ្ណោះ ដែលបែងចែកជាពីរថ្នាក់ គឺថ្នាក់ទី ២ រៀនពេលព្រឹក មានសិស្សចំនួន ១០នាក់ និងថ្នាក់ទីមួយ រៀនពេលថ្ងៃមានសិស្សចំនួន ៨នាក់។ នេះបើតាមការផ្ដល់ព័ត៌មានពីអ្នកស្រី ហៀម ចាន់ថន ដែលរស់នៅក្បែរសាលានេះ។ អ្នកស្រីបន្តថា អ្នកស្រីក៏ឱ្យកូនមករៀននៅសាលានេះផងដែរ។ អ្នកស្រី ហៀម ចាន់ថន បានបញ្ជាក់ទៀតថា គាត់សប្បាយចិត្តណាស់ដែលមានសាលានៅទីនេះ។

អ្នកស្រីប្រាប់ថា ពេលភ្លៀងធ្លាក់ខ្លាំង លោកគ្រូ អ្នកគ្រូ មិនអាចមកបង្រៀនបានឡើយ ព្រោះផ្លូវឆ្ងាយនិងដីស្អិតពិបាកធ្វើដំណើរ។ អ្នកស្រីបន្ថែមថា សាលារៀននេះមានត្រឹមតេថ្នាក់ទី ២ ដូច្នេះសិស្សដែលរៀនផុតថ្នាក់ទី ២ ត្រូវឡើងទៅរៀននៅឆ្ងាយពីផ្ទះ។

ប្រជាពលរដ្ឋក្នុងតំបន់បឹងរាល សូមអំពាវនាវដល់មន្រ្តីពាក់ព័ន្ធជួយយកចិត្តទុកដាក់លើការរស់នៅ ពិសេសការសិក្សារបស់ក្មេងៗក្នុងសហគមន៍នេសាទក្រីក្រនេះផង៕

អត្ថបទខ្លីសរសេរដោយ ហុក ដេប៉ូ យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។

The post សាលាចល័តតាមទឹកស្ម័គ្រខ្លួនផ្តល់ចំណេះដឹងដល់កូនអ្នកនេសាទក្រីក្រ appeared first on WMC.

ភ្នំពេញ៖ ក្រសួងបរិស្ថានចេញលិខិតជូនដំណឹងទៅម្ចាស់អាជីវកម្មលក់វត្ថុអនុស្សាវរីយ៍ទាំងអស់ ដោយព្រមានវិធានការផ្លូវច្បាប់ចំពោះការលួចលាក់លក់ដូរគ្រឿងចម្លាក់ធ្វើពីភ្លុកដំរី និងកុយរមាស ព្រោះផ្ទុយពីច្បាប់ព្រៃឈើត្រង់មាត្រា ៩៧ ចំណុចទី ១០ និងច្បាប់ស្តីពីតំបន់ការពារធម្មជាតិត្រង់មាត្រា ៥៩ ចំណុចទី ៥។ នេះជាការគូសបញ្ជាក់របស់លោក នេត្រ ភក្រ្តា អ្នកនាំពាក្យក្រសួងបរិស្ថាននៅថ្ងៃនេះលើទំព័រហ្វេសប៊ុករបស់ក្រសួងបរិស្ថាន។

លោក នេត្រ ភក្ត្រា ជំរុញឱ្យម្ចាស់អាជីវកម្មដែលលាក់ទុក ឬលក់វត្ថុអនុស្សាវរីយ៍ធ្វើពីភ្លុកដំរី និងកុយរមាស ត្រូវប្រគល់ជូនសមត្ថកិច្ច ពុំនោះសោត ពេលសមត្ថកិច្ចរកឃើញនិងចាប់បាន នោះនឹងប្រឈមមុខចំពោះផ្លូវច្បាប់។

អ្នកនាំពាក្យក្រសួងបរិស្ថានរូបនេះឱ្យដឹងថា ជំហានដំបូងក្រសួងបរិស្ថានជូនដំណឹងដល់ម្ចាស់អាជីវកម្មដ្ឋានលក់វត្ថុអនុស្សាវរីយ៍ចំនួន ៣២ កន្លែងនៅក្នុងខេត្តសៀមរាប និងខេត្តព្រះសីហនុ ពីការធ្វើពាណិជ្ជកម្មគ្រប់រូបភាពលើភ្លុកដំរី និងកុយរមាសគឺជាអំពើខុសច្បាប់។ ជំហានបន្ទាប់ ក្រសួងបរិស្ថាននឹងជូនដំណឹងដល់ម្ចាស់អាជីវកម្មដ្ឋានពាក់ព័ន្ធនឹងការលក់វត្ថុអនុស្សាវរីយ៍ជាគ្រឿងចម្លាក់ពីភ្លុកដំរី និងកុយរមាសឬធ្វើពាណិជ្ជកម្មក្នុងរូបភាពផ្សេងទៀតពាក់ព័ន្ធសត្វព្រៃនៅក្នុងរាជធានីភ្នំពេញ និងនៅខេត្តមួយចំនួនទៀត។

ការហាមឃាតអាជីវកម្មលក់គ្រឿងវត្ថុអនុវស្សាវរីយ៍ធ្វើពីភ្លុកដំរី និងកុយរមាសនេះ កើតឡើងបន្ទាប់ពីរបាយការណ៍អង្កេតស្រាវជ្រាវរបស់សមត្ថកិច្ចបានបង្ហាញថា មានហាងលក់វត្ថុអនុស្សាវរីយ៍មួយចំនួនមានលក់គ្រឿងចម្លាក់ពីភ្លុកដំរី និងកុយរមាសដែលច្បាប់ហាមឃាត់។ ការធ្វើពាណិជ្ជកម្មដូចជាការលក់ នាំចូលនិងនាំចេញនូវទំនិញដូចបានបញ្ជាក់ជូនខាងលើគឺជាបទល្មើសព្រហ្មទណ្ឌដោយអ្នកប្រព្រឹត្ត និងអ្នកជាប់ពាក់ព័ន្ធត្រូវផ្តន្ទាទោសជាប់ពន្ធនាគារ។

សូមបញ្ជាក់ថាកន្លងមក សមត្ថកិច្ចបានចាប់ឃាត់ភ្លុកដំរី កុយរមាស និងគ្រឿងចម្លាក់ពីភ្លុកដំរី កុយរមាសដែលលួចនាំចូលក្នុងប្រទេសកម្ពុជា និងលួចនាំចេញទៅក្រៅប្រទេសជាច្រើនករណី។ យោងតាមតួលេខដែលទទួលបាន ចាប់ពីឆ្នាំ២០១៦ រហូតមកទល់នឹងចុងឆ្នាំ ២០១៨ ភ្លុកដំរី និងកុយរមាសជាច្រើនពាន់ដុំមានទម្ងន់សរុបប្រមាណជាង ៥ តោន ត្រូវបានអាជ្ញាធរកម្ពុជាបង្ក្រាបបាន។

ក្រៅពីនោះក៏មានស្រកាពង្រូល និងឆ្អឹងសត្វព្រៃផ្សេងទៀតដែលត្រូវបានអាជ្ញាធរបង្ក្រាបបានផងដែរ។ បរទេស មួយចំនួនបានស្នើសុំឱ្យមានការដុតបំផ្លាញចោលនូវវត្ថុដ៏មានតម្លៃទាំងនេះ ប៉ុន្តែ កាលពីខែ កុម្ភៈ ឆ្នាំ ២០១៧ នាយករដ្ឋមន្ត្រីកម្ពុជាបានណែនាំឱ្យសមត្ថកិច្ចត្រូវរក្សាទុកនូវភ្លុកដំរី កុយរមាស និងសំណាកសត្វកម្រដទៃទៀត ដែលកម្លាំងសមត្ថកិច្ចបង្ក្រាបបានរក្សាទុកដើម្បីដាក់តាំងពិព័រណ៌សម្រាប់សាធារណជនទស្សនា និងសម្រាប់បម្រើឱ្យការសិក្សាស្រាវជ្រាវវិទ្យាសាស្ត្រផងដែរ។ ការរក្សាទុកនេះ ព្រោះវត្ថុទាំងនេះជារបស់កម្រហើយវាជារបស់ដែលជិតដាច់ពូជទៀតផង៕

The post ក្រសួងបរិស្ថានព្រមានផ្លូវច្បាប់ លើម្ចាស់អាជីវកម្មលក់វត្ថុអនុ ស្សាវរីយ៍ធ្វើពីភ្លុកដំរីនិងកុយរមាស appeared first on WMC.

កំពង់ធំ៖ កសិករមួយចំនួនរស់នៅក្នុងភូមិបឹងកណ្តាល ឃុំបឹង ស្រុកបារាយណ៍ ខេត្តកំពង់ធំ បានឆ្លៀតពេលធ្វើគ្រឿងសង្ហារឹម ដូចជា តុ ទូ កៅអី គ្រែ និងគ្រឿងឈើផ្សេងៗទៀត ដែលជាមុខរបរបន្ទាប់ពីការងារស្រែចំការ។

លោក ស៊ុន ឆេង ជាជាងឈើមួយរូប មានវ័យ ៦០ឆ្នាំរស់នៅភូមិបឹងកណ្តាល ឃុំបឹង ស្រុកបារាយណ៍ ខេត្តកំពង់ធំ និយាយថា លោកប្រកបមុខរបរនេះជិត ១០ឆ្នាំហើយ ពោលគឺតាំងពីឆ្នាំ២០០០មកម្ល៉េះ។ លោកបន្តថានេះ មិនមែនជាមុខរបរអាជីពទេ គ្រាន់តែជាមុខរបរបន្ទាប់បន្សំក្រៅពីរបរកសិកម្មប៉ុណ្ណោះ។

លោក ស៊ុន ឆេង ឱ្យដឹងថា នៅពេលទំនេរពីការងារដកស្ទូង និងច្រូតកាត់រួច គឺលោកតែងធ្វើ តុ ទូ កៅអី គ្រែ និងសម្ភារមួយចំនួនទៀត ដែលភ្ញៀវកុម៉្មង់។ ចំពោះប្រាក់កម្រៃវិញ គឺទទួលបានតាមការធ្វើសម្ភារតិចឬច្រើន។ លោកឱ្យដឹងថា ការងារជាជាងឈើនេះលោកចេះតពីដូនតាមក។

លោកបង្ហាញក្តីរីករាយចំពោះការងារនេះ ព្រោះវាអាចបង្កើនចំណូលបន្ថែមលើការងារកសិកម្មសម្រាប់ផ្គត់ផ្គង់គ្រួសារ៕

អត្ថបទខ្លីសរសេរដោយ ​លឿង ឧត្តម យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។

The post កំពង់ធំ៖របរធ្វើគ្រឿងសង្ហារឹមអ្នក ឃុំបឹងជួយបន្ថែមចំណូលបន្ទាប់ពីធ្វើស្រែចំការ appeared first on WMC.