ភ្នំពេញ៖ លោកនាយករដ្ឋមន្ត្រីហ៊ុន សែន នៅថ្ងៃអង្គារទី១៥ ខែកញ្ញា នេះបានអនុញ្ញាតឲ្យសិស្សនិទ្ទេស A ចំនួន១០៨នាក់ ដែលទើបប្រឡងជាប់សញ្ញាបត្រធម្យមសិក្សាទុតិយភូមិ ចូលជួបនៅវិមានសន្តិភាពនាទីស្ដីការគណៈរដ្ឋមន្ត្រី ដើម្បីផ្ដល់រង្វាន់ដល់សិស្សពូកែទាំងនោះ។
ជំនួយការផ្ទាល់របស់លោកនាយករដ្ឋមន្ត្រីគឺ លោក អ៊ាង សុផល្លែត បានឲ្យដឹងថា ក្រៅពីទទួលបានអាហារូបករណ៍នៅតាមបណ្តាមហាវិទ្យាល័យមួយចំនួននៅរាជធានីភ្នំពេញ សិស្សនិទ្ទេស A ទាំង១០៨នាក់ថែមទាំងទទួលបានថវិកាម្នាក់ៗ ២លានរៀល Samsung Tablet មួយគ្រឿង និងកាក់ប្រាក់មួយ រួមទាំងសៀវភៅមួយក្បាលទុកជាអនុស្សាវរីយ៍ផងដែរ។
គួររំឭកថា កាលពីឆ្នាំមុន សិស្សនិទ្ទេស A ចំនួន១១នាក់ បានទទួលអំណោយឧបត្ថម្ភជាច្រើនពីលោកនាយករដ្ឋមន្ត្រី ដែលក្នុងនោះ មានម៉ូតូ កុំព្យូទ័រ និងអាយផេត រួមទាំងថវិកាក្នុងម្នាក់១០០០ដុល្លារអាមេរិក បូកផ្សំនឹង២០០០ដុល្លារអាមេរិកបន្ថែមទៀតពីសប្បុរសជន៕