ភ្នំពេញ៖ អ្នកច្បាប់កម្ពុជា លោកណៃ វ៉ងដា និងលោកសុក សំអឿន ថាតុលាការមិនអាច កែប្រែអាយុ ប្រជាពលរដ្ឋបានទេ។ អ្នកច្បាប់ទាំងពីរនាក់នេះថា ក្នុងករណីដែលអាចកែបានលុះត្រាខុសឈ្មោះ ខុសបច្ចេកទេស ឬ មិនពេញចិត្តនិងឈ្មោះទើបអាចកែបាន។ មេធាវី និងអ្នកច្បាប់នៃអង្គការសង្គមស៊ីវិលនៅកម្ពុជាថ្លែងថា តុលាកាគ្មានសិទ្ធិក្នុងការកែអាយុប្រជាពលដ្ឋនោះទេ។
លោកមេធាវី សុក សំអឿន ប្រធាអង្គការក្រុមអ្នកច្បាប់ការពារសិទ្ធកម្ពុជា បានថ្លែងប្រាប់វិទ្យុស្ត្រីអេហ្វអឹម ១០២ នៅព្រឹកថ្ងៃទី ១១ ខែកញ្ញា ឆ្នាំ ២០១៥ នេះថា តុលាការមិនអាចកែអាយុបុគ្គលណាម្នាក់បានទេ លើកលែងតែក្នុងករណីមានកំហុស ក្នុងការធ្វើលិខិតបញ្ជាក់អត្តសញ្ញាណបុគ្គលម្នាក់ ដោយដាក់អាយុខុសពីអាយុពិតរបស់គេ នោះគេអាចប្ដឹងទៅតុលាការ ហើយទើបតុលាកាមានសិទ្ធិអាចកែបាន «អ្នកដែលចុះបញ្ជីជាតិ ឬក៏ជួនកាលអ្នកធ្វើកាត ធ្វើអីហ្នឹងវាខុសបញ្ជីជាតិអ៊ីចឹង ឧទាហរណ៍អ៊ីចឹង បែបហ្នឹង ដោយសារតែវាជាឯកសារ សាធារណៈទាល់តែយើងសុំទៅតុលាការ ដល់អ៊ីចឹងបើគាត់កែក្នុងន័យអ៊ីចឹងវាអត់អីទេ តែគាត់មិនអាចកែថា មនុស្សម្នាក់កើតនៅថ្ងៃប៉ុណ្ណេះ ស្រាប់តែដូរទៅឆ្នាំប៉ុណ្ណោះអី អាហ្នឹងគាត់មិនអាចធ្វើបានទេ»។
ជុំវិញបញ្ហានេះដែរ អនុប្រធានផ្នែកសិទ្ធិមនុស្ស និងមេធាវីតំបន់នៃអង្គការអាដហុក លោក ណៃ វ៉ង់ដា បានមានប្រសាសន៍ថា ការកែអាយុគឺជារឿងដែលពិបាក ដែលតុលាការគ្មានសិទ្ធិកែទេ ព្រោះវាជាព័ត៌មានពិតរបស់បុគ្គលម្នាក់ៗ។ លោកបានបន្ថែមថា តុលាការអាចកែបានត្រឹមឈ្មោះប៉ុណ្ណោះ ដោយមានការស្នើសុំពីសាមីខ្លួន ដូចជាក្នុងករណីបុគ្គលណាមួយមិនពេញចិត្តនឹងឈ្មោះខ្លួន ដោយសារគួរឲ្យចង់សើច បុគ្គលនោះអាចស្នើឲ្យតុលាការកែបាន។
លោក ណៃ វ៉ង់ដា បន្តទៀតថា លោកថាបើសិនក្នុងសង្គមមួយមានអ្នកកែអាយុច្រើននោះក្មេងជំនាន់ក្រោយនឹងគ្មានឱកាស ក្នុងការស្នងការងារ ឬ ទទួលការងារ «ការកែប្រែអាយុហ្នឹង នៅប្រទេសកម្ពុជាយើង បើយើងនិយាយថាតាមច្បាប់វាមិនត្រឹមត្រូវទេ កែតាមរូបភាពណាក៏ដោយ ក៏ប៉ុន្តែសម្រាប់ប្រទេសយើងការអនុវត្តបែបនេះ មិនមែនទើបតែមានឥឡូវទេ។ យើងក្រឡេកមើល អ្នកនយោបាយធំៗមួយៗ ឈ្មោះក៏មិនដឹងជាមានប៉ុន្មានឈ្មោះ ហើយអាយុ ថ្ងៃខែឆ្នាំកំណើតហ្នឹង មានពិត មានមិនពិត ហើយសុទ្ធតែជាមន្ត្រីជាន់ខ្ពស់ទៀត ដូច្នេះរឿងបញ្ហាទាំងអស់នេះ វាជាប្រពៃណី របស់យើងទៅហើយ។ ខ្ញុំជឿថា ការកែអាយុបន្តិចបន្តួចហ្នឹងវាមាន ផលប៉ះពាល់ខ្លះ ដោយវាក្លែងខុសពីការពិត ។ ដែលខ្ញុំនិយាយថា ការពិតសម្រាប់រូបវ័ន្តបុគ្គល ប៉ុន្តែក្នុងការធ្វើកិច្ចការងារក្នុងសង្គម បើសិនជាវាកែអាយុហ្នឹង វាច្រើនពេកវាអាចប៉ះពាល់ដែរ ពាក់ព័ន្ធនឹងអាយុក្នុងការធ្វើការ ឧទាហរណ៍ថាកែរហូតដល់ ១០ឆ្នាំ ដប់ឆ្នាំជាង អីអ៊ីចឹងទៅ ក៏ប៉ុន្តែបើកែត្រឹមមួយ ឬពីរឆ្នាំ អីអ៊ីចឹង វាមិនត្រូវច្បាប់ទេកែអ៊ីចឹង ក៏ប៉ុន្តែវាក៏មិនប៉ះពាល់ប្រសិទ្ធិភាពការងារទេ»។
គួររម្លឹកផងដែរថា នាពេលថ្មីៗនេះ មានបេក្ខជនប្រឡងក្របខណ្ឌមន្ត្រីរាជការនៃក្រសួងវប្បធម៌ និងវិចិត្រសិល្បៈ មានអាយុប្រមាណ ៥០ ឆ្នាំ លើសការកំណត់របស់ក្រសួងដែលតម្រូវឲ្យបេក្ខជនមានអាយុច្រើនបំផុតពី ២៥ ឆ្នាំដល់ ៣០ ឆ្នាំ ប៉ុន្តែបុរសនោះបានកែអាយុរបស់ខ្លួនមកនៅត្រឹម ២៧ ឆ្នាំវិញ ហើយគាត់បានប្រឡង់ជាប់ ជាហេតុធ្វើឲ្យមានការតវ៉ាពីបេក្ខជនផ្សេងៗទៀត ដែលមានអាយុត្រូវតាមលក្ខខណ្ឌរបស់ក្រសួង៕