ឥណ្ឌូនេស៊ី៖ ប្រជាជនឥណ្ឌូនេស៊ីភាគច្រើនកំពុងអង្គុយរង់ចាំធនាគារទូកតែមួយគត់ បើកទ្វាដំណើរការនៅលើច្រាំងនៃកោះអ៊ុនតុងចាវា (Untung Jawa)ដែលជាតំបន់រណបមានទីតាំងនៅឆ្ងាយពីទីក្រុងចាកាតាក្នុងប្រទេសឥណ្ឌូនេស៊ី។ ប្រជាជនរាប់លាននាក់រស់នៅតំបន់ជាយក្រុងនៃប្រជុំកោះជាច្រើននោះ ពិបាកក្នុងការស្វែងរកសេវាហិរញ្ញវត្ថុដែលបញ្ហានេះជំរុញឲ្យធនាគារជាតិឥណ្ឌូណេស៊ីហៅកាត់ថា BRI បង្កើតធនាគារទូកមានគំរោងបង្កើតបន្ថែមទៀត។
កន្លងទៅធនាគារទូកនេះ ធ្វើការពីថ្ងៃច័ន្ទដល់ថ្ងៃសុក្រដោយធ្វើដំណើរពីកោះមួយទៅកាន់កោះមួយទៀត ដើម្បីផ្តល់សេវាដកប្រាក់ ដាក់ប្រាក់ ព្រមទាំងខ្ចីប្រាក់ជាដើម ដោយសារប្រទេសឥណ្ឌូណេស៊ីមានប្រជុំកោះច្រើនដល់ទៅជាង១៧ពាន់កោះ ហើយប្រជាជនភាគច្រើនរស់នៅលើកោះដែលនៅដាច់ស្រយាលដូចជាកោះអ៊ុនតុងចាវានេះ ដូច្នេះពួកគេចាំបាច់ត្រូវមានធនាគារនៅគៀកនឹងពួកគេ ដើម្បីបង្កភាពងាយស្រួលក្នុងជីវភាពរស់នៅប្រចាំថ្ងៃ។
ជាម្ចាស់តូបលក់ទំនិញនៅតំបន់នោះ លោក អាស៊ីស (Azis) បាននិយាយថា មានធនាគារចល័តបែបនេះពិតជាផ្តល់ផលប្រយោជន៍ច្រើនណាស់ ពីព្រោះលោកអាចដកប្រាក់ពីធនាគារម្តងក្នុងមួយសប្តាហ៍បានដោយមិនចាំបាច់ធ្វើដំណើរទៅដកប្រាក់ដល់ទីក្រុងចាកាតាឡើយ «ខ្ញុំទទួលបានប្រយោជន៍ច្រើនណាស់ពីធនាគាទូកនេះ ប៉ុន្តែខ្ញុំសង្ឃឹមថាធនាគារនេះនឹងមកកោះនេះរាល់ថ្ងៃ»។
មិនត្រឹមតែ លោក អាស៊ីស ម្នាក់ឡើយដែលរំពឹងចង់បានដូច្នេះ បើតាមធនាគារជាតិនេះ មានប្រជាជនឥណ្ឌូណេស៊ីចំនួនប្រហែល៣៦ភាគរយប៉ុណ្ណោះដែលមានគណនីក្នុងធនាគារ ប៉ុន្តែនេះជាធនាគារទូកដំបូងបំផុតនៅឥណ្ឌូនេស៊ី ដែលកំពុងប្រតិបត្តិការធនាគារទូកនេះ បានជួបនូវឧបសគ្គមួយចំនួនដូចជាបញ្ហាលើការតម្លើងហេដ្ឋារចនាសម្ព័ន្ធ រួមទាំងបញ្ហាសុវត្ថិភាពផងដែរ។
បើតាមសម្តីរបស់មន្ត្រីភ្នាក់ងារនៃធនាគារជាតិ BRI លោក វ៉ាហ៊ីយូ អាឌី ធីយ៉ាហ៊ីយ៉ាន់តូ (Wahyu Adi Tyahiyanto) បានឲ្យដឹងបន្ថែមលើបញ្ហានេះដែរថា៖ «ដំណើរការធនាគារក៏អាស្រ័យទៅលើអាកាសធាតុដែរ បើអាកាសធាតុមិនល្អ យើងក៏មិនអាចដំណើរការបានដែរ»។ បង្ហាញលើការលើកឡើងនេះ គេកត់សម្គាល់ឃើញបញ្ហាមួយទៀតនោះ គឺការអប់រំឲ្យប្រជាជនយល់ពីរបៀបប្រើប្រាស់ប្រព័ន្ធធនាគារថ្មីនេះ។
គួរបញ្ជាក់ផងដែរថា ធនាគារជាតិរបស់ឥណ្ឌូនេស៊ី គ្រោងនឹងបង្កើតធនាគារទូកឲ្យបានច្រើនបន្ថែមទៀតដែរនៅឆ្នាំបន្តបន្ទាប់ ដោយរំពឹងថាវាអាចជួយដល់កំណើនសេដ្ឋកិច្ចជាតិឥណ្ឌូនេស៊ី ហើយគណៈគ្រប់គ្រងធនាគារក៏រំពឹងផងដែរថាថ្ងៃក្រោយទៅ ក្មេងៗជំនាន់ក្រោយនឹងចេះប្រើប្រាស់ប្រព័ន្ធធនាគារនេះដើម្បីជាប្រយោជន៍ផ្ទាល់ខ្លួនពួកគេ។
ប្រភព៖ BBC
